خواتین ون ڈے: بلے بازی رینکنگ میں مندھانا پھر سر فہرست

دبئی، 16 ستمبر (یو این آئی) ہندوستانی سلامی بلے باز اسمرتی مندھانا نے اتوار کو نیو چنڈی گڑھ میں کھیلے گئے تین میچوں کے ون ڈے سیریز کے پہلے میچ میں آسٹریلیا کے خلاف شاندار نصف سنچری بنائی تھی، جس کے ساتھ ہی انہوں نے آئی سی سی خواتین ون ڈے بلے بازی درجہ بندی میں دوبارہ پہلا مقام حاصل کر لیا ہے۔
بائیں ہاتھ کی بلے باز نے 63 گیندوں پر چھ چوکے اور دو چھکے لگا کر 58 رنز کی اننگز کھیلی اور انگلینڈ کی کپتان نیٹ شیور-برنٹ کو پیچھے چھوڑتے ہوئے وہ مقام دوبارہ حاصل کر لیا ہے، جو انہوں نے پہلی بار جنوری 2019 میں حاصل کیا تھا اور حال ہی میں اس سال جولائی میں بھی حاصل کیا تھا۔
آسٹریلیا نے آٹھ وکٹ سے جیت حاصل کی اور یہ جیت ان کی کھلاڑیوں کی رینکنگ میں بھی نظر آئی۔ بائیں ہاتھ کی بلے باز بیتھ مونی نے 74 گیندوں پر ناٹ آؤٹ 77 رنز کی اننگز کھیل کر تین درجے بہتری کے ساتھ پانچویں نمبر پر پہنچ گئی ہیں۔
اینا بیل سدرلینڈ اپنی ناٹ آؤٹ 54 رنز کی اننگز کے بعد چار درجے بہتری کے ساتھ 25ویں مقام پر پہنچ گئی ہیں۔ وہ سلامی بلے باز فوبی لیچ فیلڈ کے ساتھ مشترکہ طور پر سب سے اوپر ہیں۔ فوبی لیچ فیلڈ نے 80 گیندوں پر 88 رنز کی اننگز کھیل کر 13 درجے بہتری کے ساتھ میچ کی بہترین کھلاڑی بنیں۔
مندھانا کے علاوہ تازہ ترین ہفتہ وار اپڈیٹ میں جن ہندوستانی بلے بازوں کو فائدہ ہوا ہے، ان میں رچا گھوش شامل ہیں، جو اپنی 25 رنز کی اننگز کے بعد 39ویں سے 36ویں نمبر پر پہنچ گئی ہیں۔
اوپنر بلے باز پرتیکا راول 96 گیندوں پر 64 رنز کی اننگز کے بعد چار درجے بہتری کے ساتھ 42ویں نمبر پر پہنچ گئیں۔ ہرلین دیول 57 گیندوں پر 54 رنز کی اننگز کے بعد پانچ درجے بہتری کے ساتھ 43ویں نمبر پر پہنچ گئیں۔
گیند بازی کی درجہ بندی میں آسٹریلیا کی کم گارتھ اور آلانہ کنگ بالترتیب چوتھے اور پانچویں نمبر پر پہنچ گئی ہیں، جبکہ سدرلینڈ دو درجے بہتری کے بعد 21ویں نمبر پر پہنچ گئی ہیں۔ ان تینوں نے ایک ایک وکٹ حاصل کیے ہیں۔ ہندوستان کی سنہا رانا پانچ درجے بہتری کے ساتھ 16ویں نمبر پر پہنچ گئی ہیں۔