جون پور بس حادثے میں چار افراد کی موت پر وشنو دیو سائی نے دکھ کا اظہار کیا

رائے پور، 15 ستمبر (یو این آئی) چھتیس گڑھ کے وزیراعلیٰ وشنودیو سائی نے اتر پردیش کے جون پور ضلع میں وارانسی-لکھنؤ قومی شاہراہ پر پیر کی صبح پیش آئے بس حادثے میں ریاست کے چار افراد کی موت پر گہرا دکھ ظاہر کیا ہے ۔
ایودھیا سے واپس آ رہی چھتیس گڑھ کی ڈبل ڈیکر بس ایک ٹرک سے ٹکرا گئی، جس میں کانکیر اور راجناند گاؤں ضلع کے چار عقیدتمند موقع پر ہی جاں بحق ہو گئے جبکہ چھ افراد شدید زخمی ہوگئے ۔
حادثے کی اطلاع ملتے ہی پولیس اور ضلع انتظامیہ کی ٹیم جائے حادثہ پر پہنچی۔ زخمیوں کو فوری طور پر قریبی ہسپتال میں داخل کرایا گیا، جبکہ مرنے والے افراد کی لاشوں کو پوسٹ مارٹم کے لیے بھیجا گیا۔ بس میں کل 50 مسافر سوار تھے جو ایودھیا کے درشن کے بعد کاشی وشوناتھ مندر کی طرف روانہ ہوئے تھے ۔
مہلوکین میں کانکیر اور راجناند گاؤں ضلع کی آشا بھوال، گلاب، بس ڈرائیور دیپک اور ایک دیگر نامعلوم مسافر شامل ہیں۔
اس حادثے پر چھتیس گڑھ کے وزیر اعلیٰ مسٹر سائی نے دکھ کا اظہارِ کرتے ہوئے سوشل میڈیا پلیٹ فارم ‘ایکس’ پر لکھا، ”یہ دل دہلا دینے والی خبر ہے ۔ بھگوان شری رام مرنے والوں کی آتما کو اپنے قدموں میں جگہ دیں اور اہل خانہ کو اس مشکل وقت میں حوصلہ عطا کریں۔ زخمیوں کی جلد صحت یابی کے لیے دعا گو ہوں۔”
وزیراعلیٰ نے دونوں اضلاع کی انتظامیہ کو ہدایت دی ہے کہ متاثرہ کنبوں کو ہر ممکن مدد فراہم کی جائے اور زخمیوں کا مناسب علاج یقینی بنایا جائے ۔