اسرائیلی حملے کا دنیا میں خام تیل کی قیمتوں پر اثر

نیویارک، 13 ستمبر (یو این آئی) اسرائیلی حملے دنیا بھر میں خام تیل کی قیمتوں پر اثر انداز ہونے لگے ہیں، ایران پر حملوں کے بعد اب قطر پر حملے کے بعد بھی ایک بار پھر عالمی منڈی میں کروڈ آئل مہنگا ہوگیا۔
غیر ملکی خبر رساں ایجنسی روئٹرز کے مطابق منگل کے روز عالمی منڈی میں خام تیل کی قیمتوں میں اس وقت اضافہ ہوا، جب اسرائیل نے اعلان کیا کہ اس نے قطر کے دارالحکومت دوحہ میں حماس کی قیادت پر حملہ کر دیا ہے ۔ اس واقعے کے بعد تیل کی قیمتیں وقتی طور پر تقریباً 2 فیصد بڑھ گئیں۔
قطر پر اسرائیلی حملے نے خطے کے استحکام کے ساتھ ساتھ تیل کی قیمتوں کو بھی ہلا ڈالا تھا، ڈیلوٹی آئی خام تیل کی قیمت 0.6 فی صد اضافہ کے بعد فی بیرل تیل کی قیمت 62 ڈالر 63 سینٹ پر پہنچی، برینٹ خام تیل کی قیمت بھی اضافے کے بعد فی بیرل 66 ڈالر 39 سینٹ ہو گئی۔ تاہم دوسری طرف تجزیہ کاروں کا کہنا تھا کہ حملے سے فوری طور پر تیل کی فراہمی میں کوئی خلل نہیں آیا اور نہ ہی خطے میں مزید کشیدگی کے آثار نمایاں ہوئے ، اس لیے مارکیٹ میں زیادہ ردعمل نہیں آیا۔
روئٹرز کے مطابق تیل کی قیمتوں پر دباؤ کی دیگر وجوہ بھی تھیں، جن میں اوپیک پلس کی جانب سے کم پیداوار بڑھانا، چین کی جانب سے تیل کے ذخائر میں اضافہ، روس پر ممکنہ نئی پابندیوں کا خدشہ اور امریکی تیل ذخائر میں اضافہ شامل ہیں۔
یاد رہے کہ ایران اسرائیل جنگ کی وجہ سے بھی بین الاقوامی مارکیٹ میں خام تیل کی قیمتیں 5 ماہ کی بلند ترین سطح پر پہنچ گئی تھیں، حملے کے بعد بین الاقوامی منڈی میں خام تیل کی قیمتوں میں 3 فی صد اضافہ ریکارڈ کیا گیا۔ روئٹرز کا کہنا تھا کہ لندن برینٹ خام تیل 2.49 ڈالر اضافے کے ساتھ 78.93 پر پہنچا، ویسٹ ٹیکساس خام تیل کی قیمت میں بھی 2.56 اضافہ ہوا، جب کہ بین الاقوامی مارکیٹ میں خام تیل کی ٹریڈنگ 3 فی صد اضافے کے ساتھ کھلی تھی۔