ہماچل میں ستمبر میں سب سے زیادہ بارش، کلّو میں 363 فیصد زیادہ بارش ریکارڈ

شملہ، 12 ستمبر (یو این آئی) ہماچل پردیش میں حالیہ ستمبر کے مہینے میں سب سے زیادہ بارش ہوئی۔ ریاست میں کلّو ضلع میں گزشتہ 12 دنوں میں 363 فیصد زیادہ بارش ریکارڈ کی گئی، جبکہ روہتانگ اور بارالاجا لا جیسے اونچائی پر واقع علاقوں میں موسم کی شروعات ہی میں برف باری ہو چکی ہے ۔
شملہ ضلع میں بھی غیر معمولی طور پر شدید بارش ہوئی، یہاں معمول سے 105 فیصد زیادہ بارش ریکارڈ کی گئی۔ بلاس پور، منڈی اور سولن میں 72 فیصد زیادہ بارش ہوئی، جبکہ او نا اور ہمیر پور میں بالترتیب 68 فیصد اور 51 فیصد زیادہ بارش ریکارڈ کی گئی۔ چمبا اور کننور میں اوسط سے 30 فیصد اور 33 فیصد زیادہ بارش ہوئی، جبکہ کانگڑا میں 13 فیصد زیادہ اور لاہول-سپیتی میں معمول سے 14 فیصد کم بارش ریکارڈ کی گئی۔
ریاست کے کئی حصوں میں آج بھی بارش ہوئی، جس میں منڈی میں سب سے زیادہ 61.8 ملی میٹر، سندر نگر میں 52.4، کانگڑا ایرو میں 43.7 اور جگندر نگر میں 27 ملی میٹر بارش ہوئی۔ علاوہ ازیں، دھرمشالہ میں 23.5 ملی میٹر، کسولی میں 17.2 ملی میٹر اور کُفری میں 8.4 ملی میٹر بارش ہوئی۔ ریاست کی دارالحکومت شملہ ایرو میں 6.5 ملی میٹر بارش ریکارڈ کی گئی، جبکہ سوجان پور تیرا، پالم پور اور بلاس پور میں ہلکی بارش ہوئی۔
اس غیر معمولی بارش کی وجہ سے ریاست میں بار بار زمینی تودے کھسکنے اور اچانک سیلاب کے واقعات پیش آ رہے ہیں، جس سے ٹریفک متاثر ہو رہا ہے اور فصلوں کو نقصان پہنچ رہا ہے ۔
افسران نے بالائی علاقوں میں مزید بارش اور برف باری کے پیشگی اندازے کے پیش نظر مقامی رہائشیوں اور سیاحوں کو محتاط رہنے کی ہدایت دی ہے