ٹرمپ کا روس کے خلاف پابندیوں کا دوسرا مرحلہ شروع کرنے کا فیصلہ

واشنگٹن، 8 ستمبر (یو این آئی) امریکی صدر ڈونلڈ ٹرمپ کا کہنا ہے کہ یوکرین تنازع پر روس کے خلاف پابندیوں کا دوسرا مرحلہ شروع کرنے کے لیے تیار ہیں۔
غیر ملکی ذرائع ابلاغ کے مطابق امریکی صدر ڈونلڈ ٹرمپ نے وائٹ ہاؤس میں صحافیوں سے گفتگو کرتے ہوئے کہا کہ میری قازقستان کے صدر قاسم جومارت سے ٹیلیفون پر گفتگو ہوئی جو بہت اچھی رہی۔
روسی کی جانب سے یوکرین پر حالیہ حملوں پر امریکی صدر سے ایک صحافی نے مزید پابندیوں کے بارے میں سوال کیا۔
امریکی صدر نے جواب میں کہا کہ جی ہاں ہم روس کے خلاف پابندیوں کے اگلے مرحلے کی جانب بڑھ رہے ہیں۔
واضح رہے کہ صدر ٹرمپ بعض یورپی اتحادیوں کی جانب سے اب بھی روس سے تیل اور دیگر قسم کی تجارت جاری رکھنے پر خوش نہیں جبکہ انہوں نے روس سے تیل خریدنے پر بھارت پر بھاری ٹیرف عائد کیے ہیں۔