پینٹاگن کا نام بدل کر ’ڈپارٹمنٹ آف وار‘ رکھا گیا

امریکہ کے صدر ڈونلڈ ٹرمپ نے محکمہ دفاع یعنی پینٹاگن کا نام بدل کر اسے ‘‘ ڈپارٹمنٹ آف وار ’’ یعنی محکمہ جنگ کرنے کے ایک ایگزیکٹو آرڈر پر دستخط کیے ہیں۔
انہوں نے اوول آفس میں صحافیوں سے کہا کہ دنیا کی موجودہ صورتحال کو دیکھتے ہوئے یہ نام زیادہ ’مناسب‘ہے ۔
مسٹر ٹرمپ نے جمعہ کے روزایک حکم نامے پر دستخط کرنے سے پہلے سی این این کی ایک رپورٹ کا حوالہ دیتے ہوئے کہا،‘‘میرے خیال میں یہ نام زیادہ مناسب ہے ، خاص طور پر دنیا کی موجودہ صورتحال کو دیکھتے ہوئے ۔ ہمارے پاس دنیا کی سب سے طاقتور فوج ہے ۔’’
پینٹاگن کے حکام نے وزیر دفاع پیٹ ہیگستھ کے دفتر کے باہر لگے سائن بورڈز بدل دیے اور محکمے کی ویب سائٹ کو بھی اپڈیٹ کیا گیا۔ پرانی ویب سائٹ، Defense.gov اب War.gov پر منتقل ہو گئی ہے ، جہاں سب سے اوپر ‘‘یو ایس ڈپارٹمنٹ آف وار ’’ لکھا ہے ۔ محکمۂ دفاع کا مخفف ڈی او ڈی بھی مختلف سرخیوں میں وار ڈیپارٹمنٹ کے لیے ڈی او ڈبلیو سے بدل دیا گیا ہے ۔
ہیگستھ نے اوول آفس میں صدر کے ساتھ کہا کہ نام کی تبدیلی ’صرف نام بدلنے کے بارے میں نہیں، بلکہ بحالی کے بارے میں ہے ‘۔انہوں نے کہا کہ فوج ’صرف دفاع کے لیے نہیں، بلکہ جارحانہ حکمت عملی اپنائے گی‘ اور نام کی تبدیلی سے یہ بھی ظاہر ہوتا ہے کہ ملک’صرف محافظوں کو نہیں بلکہ لڑنے والے جانبازوں کو تیار کرے گا‘۔