راؤنڈ گلاس ہاکی اکیڈمی نے ایس اے آئی سونی پت کو ہرا کر ٹیبل میں پہلی پوزیشن حاصل کی

موہالی، 4 ستمبر (یو این آئی) راؤنڈ گلاس ہاکی اکیڈمی نے اسپورٹس اتھارٹی آف انڈیا نیشنل سینٹر آف ایکسی لینس ایس اے آئی، سونی پت کو 3-1 سے شکست دے کر پنجاب ہاکی لیگ (انڈر 21) کے دوسرے ایڈیشن کے چوتھے دن پوائنٹس ٹیبل میں پہلا مقام حاصل کیا۔ یہ لیگ اولمپیئن بلبیر سنگھ سینئر انٹرنیشنل ہاکی سٹیڈیم میں کھیلی جا رہی ہے۔ نامدھاری ہاکی اکیڈمی نے مقررہ وقت میں 1-1 سے برابری کے بعد ایس جی پی سی ہاکی اکیڈمی، امرتسر کے خلاف شوٹ آؤٹ میں جیت حاصل کرتے ہوئے بونس پوائنٹ حاصل کیا۔
راؤنڈ گلاس ہاکی اکیڈمی نے پہلے ہی منٹ میں گرسیوک سنگھ کے گول کے ذریعے برتری حاصل کی اور 27ویں منٹ میں امندیپ سنگھ کے پنالٹی کارنر پر گول کرکے اپنی برتری کو دوگنا کردیا۔ فاتح ٹیم نے 33ویں منٹ میں جوبن پریت سنگھ کے گول سے اپنی برتری کو مزید بڑھا دیا۔ نوراج سنگھ نے آخری منٹوں میں ایس اے آئی کے لیے گول کیا لیکن اس وقت تک بہت دیر ہو چکی تھی اور راؤنڈ گلاس ہاکی اکیڈمی نے ایک آسان جیت درج کی اور اپنے حریف کو پیچھے چھوڑ کر ٹیبل پرپہلا مقام حاصل کرلیا۔
دن کے پہلے میچ میں، پی آئی ایس سرجیت ہاکی اکیڈمی، جالندھر نے ایس ڈی اے ٹی ہاکی اکیڈمی، تمل ناڈو کو 4-1 سے شکست دے کر لیگ میں اپنی دوسری جیت درج کی۔ ہاف ٹائم پر، دونوں ٹیمیں 1-1 سے برابر تھیں، جس میں سرجیت ہاکی اکیڈمی کے لیے ہرمولبیر سنگھ اور ایس ڈی اے ٹی کے لیے ایم سوگومار نے گول کیا۔ دوسرے ہاف میں اجے پال سنگھ، منمیت سنگھ رائے اور چرنجیت سنگھ کے گولوں نے جالندھر کی ٹیم کی آسان جیت کو یقینی بنایا۔
دن کے آخری میچ میں، نول ٹاٹا ہاکی اکیڈمی، جمشید پور نے ایک گول سے پیچھے رہنے کے بعد واپسی کرتے ہوئے گھمن ہیرا رائزرز ہاکی اکیڈمی، نئی دہلی کو 3-1 سے ہرادیا۔ نول ٹاٹا کی جانب سے سبین کیرو نے ہیٹ ٹرک کی جبکہ پراکشت نے گھمنہیرا رائزرز کے لیے تسلی بخش گول کیا۔