ہندوستان اور تھائی لینڈ کی افواج ‘میتری مشق’ میں مشترکہ جنگی مہارتوں کا مظاہرہ کریں گی

نئی دہلی 2 ستمبر (یو این آئی) ہندوستان اور تھائی لینڈ کے فوجی دو ہفتے طویل مشترکہ فوجی ‘ابھیاس میتری-14’ کے دوران جنگ کی مہارت کے ساتھ ساتھ باہمی تجربات کا تبادلہ کریں گے ۔ میگھالیہ کے عمروئی میں جوائنٹ ٹریننگ نوڈ میں 14 ستمبر تک جاری رہنے والی اس مشق کا پیر کو افتتاح کیا گیا۔ دونوں ممالک کے درمیان فوجی تبادلے کے تحت منعقد ہونے والی مشترکہ مشق کا مقصد ہندوستانی فوج اور رائل تھائی آرمی کے درمیان باہمی تعاون اور باہمی مفاہمت کو بڑھانا ہے ۔ پچھلی بار یہ مشق تھائی لینڈ کے صوبہ ٹاک کے فورٹ وچیراپراکن میں منعقد ہوئی تھی۔ مشق میں ہندوستانی فوج کے 120 فوجیوں کے دستے کی نمائندگی مدراس رجمنٹ کی بٹالین کر رہی ہے ۔ رائل تھائی آرمی کے 53 سپاہیوں کے دستے کی نمائندگی 14ویں انفنٹری بریگیڈ کی پہلی انفنٹری بٹالین کر رہی ہے ۔
مشترکہ مشق اقوام متحدہ کے چارٹر کے باب سات کے تحت نیم شہری علاقوں میں کمپنی کی سطح پر انسداد دہشت گردی کی کارروائیوں پر توجہ مرکوز کرے گی اور اس میں حکمت عملی کی مشقیں، مشترکہ منصوبہ بندی، خصوصی ہتھیاروں کی مہارت، جسمانی فٹنس اور چھاپہ مار کارروائیاں شامل ہوں گی۔
میتری مشق، جو 2006 میں شروع ہوئی تھی، دونوں ممالک کے درمیان اہم مشترکہ تربیتی مشقوں میں سے ایک ہے ۔ مشق کا مقصد دوطرفہ دفاعی تعاون کو مزید مضبوط بنانا اور خطے میں امن، استحکام اور سلامتی کے لیے دونوں فوجوں کے مشترکہ عزم کو بھی ظاہر کرنا ہے ۔