وشنو دیو سائی نے امت شاہ پر موئترا کے بیان کو مجرمانہ عمل قرار دیا

رائے پور، 30 اگست (یو این آئی) چھتیس گڑھ کے وزیراعلیٰ وشنو دیو سائی نے کہا ہے کہ امداد باہمی اور امور داخلہ کے مرکزی وزیر امت شاہ کے بارے میں ترنمول کانگریس کی رکن پارلیمنٹ مہوا موئترا کا بیان نہ صرف توہین آمیز ہے بلکہ یہ ایک سنگین مجرمانہ عمل بھی ہے ۔
مسٹر سائی نے جمعہ کے روز ایکس پر کہا، ‘‘ترنمول کانگریس کی اعلیٰ قیادت اور وزیر اعلیٰ ممتا بنرجی کی سرپرستی کے بغیر ایسے تبصرے کرنا ممکن نہیں ہے ۔ محترمہ ممتا بنرجی جی کو یہ واضح کرنا چاہیے کہ مہوا موئترا کے بیان سے ان کو اتفاق ہے یا نہیں۔ اگر وہ متفق نہیں ہیں تو اپنی جماعت کی رہنما کے خلاف تادیبی کارروائی کریں اور اس عمل کے لیے پورے ملک سے معافی مانگیں۔’’
انہوں نے کہا، ‘‘ملک کی سلامتی اور یکجہتی کے نگہبان وزیر داخلہ کے لئے اس طرح کی ناشائستہ زبان کا استعمال اپوزیشن کی گندی ذہنیت اور سیاسی دیوالیہ پن کا غماز ہے ۔ یہ بیان 140 کروڑ ہندوستانیوں کے وقارپر حملہ ہے ۔’’