جسٹس آلوک ارادھے اور جسٹس وپل پنچولی نے حلف اٹھایا

نئی دہلی، 29 اگست (یو این آئی) ہندوستان کے چیف جسٹس بی۔ آر۔ گوئی نے بمبئی ہائی کورٹ کے سابق چیف جسٹس جسٹس آلوک ارادھے اور پٹنہ ہائی کورٹ کے سابق چیف جسٹس جسٹس وپل پنچولی کو جمعہ کے روز سپریم کورٹ کے جج کے طور پر عہدے کا حلف دلایا۔
گزشتہ 25 اگست کو سپریم کورٹ کولیجیئم کی سفارش کے بعد، مرکز نے 27 اگست کو ان کی تقرریوں پر رضامندی ظاہر کی تھی۔ ان تقرریوں کے ساتھ سپریم کورٹ میں کام کرنے والے ججوں کی کل منظور شدہ تعداد 34 تک پہنچ گئی ہے ۔
گجرات ہائی کورٹ میں جج رہے جسٹس وپل پنچولی کی ترقی نے اس وقت سب کی توجہ اپنی طرف مبذول کرائی جب یہ خبریں آئیں کہ کولیجیئم کی میٹنگ کے دوران جسٹس بی۔ وی۔ ناگرَتنا نے ان کے نام پر اختلاف ظاہر کیا تھا۔ جسٹس پنچولی 28 مئی 2033 تک سپریم کورٹ میں خدمات انجام دیں گے ۔
جسٹس آلوک ارادھے نے اپنا عدالتی کیریئر مدھیہ پردیش ہائی کورٹ سے شروع کیا اور پھر کرناٹک ہائی کورٹ اور جموں و کشمیر ہائی کورٹ میں عدالتی خدمات انجام دیں۔ بعد میں وہ تلنگانہ ہائی کورٹ کے چیف جسٹس بنے اور پھر انہیں بمبئی ہائی کورٹ کا چیف جسٹس مقرر کیا گیا۔ سپریم کورٹ میں ان کی مدتِ کار 13 اپریل 2029 تک رہے گی۔