مصر نے غزہ کیلئے امدادی سامان سے لدے 1288ٹرک بھیجے

مصر نے 27 جولائی سے 17 اگست کے درمیان غزہ کی پٹی میں انسانی بنیادوں پر امدادی سامان سے بھرے 1288ٹرک بھیجے ہیں یہ اطلاع مصری وزارت خارجہ کی طرف سے بدھ کو جاری کردہ شماریاتی چارٹ میں دی گئی ہے چارٹ سے پتہ چلتا ہے کہ امدادی سامان لے جانے والے تقریباً 5000 ٹرک ابھی بھی غزہ میں داخل ہونے کے منتظر ہیں وزارت کے مطابق، مصر نے اکتوبر 2023 سے غزہ میں 550000 ٹن طبی امداد اور خوراک پہنچانے میں مدد کی ہے، جو اس علاقے میں بھیجی جانے والی کل انسانی امداد کا تقریباً 70 فیصد ہے۔
چارٹ کے مطابق نومبر 2023 سے جولائی 2025 تک مصر نے زخمی فلسطینیوں کو طبی امداد فراہم کرنے کے لیے 209 ایمبولینسیں تعینات کیں، 18560 زخمی فلسطینیوں اور ان کے ساتھیوں کی دیکھ بھال کی اور انہیں 172 مصری اسپتالوں میں داخل کیا۔ مصری غیر سرکاری تنظیموں کے 35000 رضاکاروں نے انسانی امداد پہنچانے میں مدد کی ہے۔
غزہ کے محکمہ صحت کے حکام نے بدھ کے روز ایک اپ ڈیٹ میں کہا کہ 7 اکتوبر 2023 سے غزہ میں اسرائیل کے جاری فوجی آپریشن میں 62122 فلسطینی ہلاک اور 156758 دیگر زخمی ہو چکے ہیں۔ بنیادی ڈھانچے کو بھی بڑے پیمانے پر نقصان پہنچا ہے اور انسانی حالات خراب ہوئے ہیں۔
انہوں نے کہا کہ غزہ میں قحط اور غذائی قلت کے باعث 269 افراد ہلاک ہو چکے ہیں جن میں 112 بچے شامل ہیں۔