ہندوستان نے مردوں کی 10 میٹر ایئر رائفل ٹیم ایونٹ میں طلائی تمغہ جیتا

شیمکینٹ (قازقستان)، 21 اگست (یواین آئی) ہندوستان کے رودرآنکش پاٹل، ارجن بابوٹا اور کرن جادھو نے جمعرات کے روز ایشین شوٹنگ چیمپئن شپ 2025 میں 10 میٹر ایئر رائفل مردوں کے ٹیم مقابلے میں طلائی تمغہ حاصل کیا یہاں منعقدہ مقابلے میں ہندوستانی کھلاڑیوں نے کُل 1892.5 پوائنٹس حاصل کیے، جس میں پاٹل نے 632.3 پوائنٹس کے ساتھ سب سے آگے رہتے ہوئے کوالیفائنگ راؤنڈ میں بھی پہلا مقام حاصل کیا اور انفرادی فائنل میں جگہ بنائی۔
ارجن بابوٹا نے 631.6 پوائنٹس کے ساتھ پریلیمنری اسٹیج میں چوتھا مقام حاصل کیا اور میڈل راؤنڈ میں بھی جگہ بنائی۔ لیکن 628.6 پوائنٹس کے ساتھ دسویں نمبر پر رہے کرن آٹھ نشانہ بازوں کے فائنل میں جگہ بنانے سے محروم ہوگئے۔
چین نے 1889.2 پوائنٹس کے ساتھ چاندی کا تمغہ جیتا جبکہ جنوبی کوریا نے 1885.7 پوائنٹس کے ساتھ کانسی کا تمغہ حاصل کیا۔
رودرآنکش پاٹل اور ارجن بابوٹا اس ہندوستانی ٹیم کا بھی حصہ تھے جس نے کویت میں پچھلے ایڈیشن میں اسی ایونٹ میں کانسی کا تمغہ جیتا تھا۔ کارتک راج 2024 میں ٹیم کے تیسرے شوٹر تھے۔
مردوں کے انفرادی 10 میٹر ایئر رائفل ایونٹ کے فائنل میں، سابق عالمی چیمپئن رودرآنکش چوتھے مقام پر رہ کر پوڈیم سے محروم ہوگئے جبکہ ارجن بابوٹا پانچویں نمبر پر رہے۔
قازقستان کے شوٹر اسلام ستپایف نے سونے کا تمغہ جیتا جبکہ چین کے لو ڈنگکے اور جنوبی کوریا کے ہاجون پارک نے انفرادی پوڈیم مقامات حاصل کیے۔
ایشین شوٹنگ چیمپئن شپ میں یہ ہندوستان کا دوسرا سینئرز کاطلائی تمغہ تھا، اس سے پہلے بدھ کے روزاننت جیت سنگھ ناروکا نے مردوں کا اسکیٹ ٹائٹل جیتا تھا۔
ہندوستان کے سینئر شوٹرز نے شیمکینٹ میں ایک چاندی اور چار کانسی کے تمغے بھی جیتے ہیں، جس سے کل تمغوں کی تعداد سات ہوگئی ہے۔
دو بار کی اولمپک تمغہ جیتنے والی منو بھاکر نے خواتین کی 10 میٹر ایئر پسٹل انفرادی اور ٹیم ایونٹ میں کانسی کے تمغے جیتے ہیں۔ وہ 25 میٹر ایونٹ میں بھی حصہ لیں گی۔