منشیات کی سمگلنگ :سرکاری ملازم کو نوکری سے برطرف کیا گیا

جموں و کشمیر حکومت نے پولیس اسٹیشن کاکپورہ میں ایف آئی آر ۴۳/۲۰۲۴ کے تحت درج منشیات کے معاملے میں ملوث پائے جانے کے بعد آبپاشی ڈویڑن ترال میں تعینات ایک آرڈلی کم چوکیدار فاروق احمد نجار کو ملازمت سے برخاست کر دیا ہے۔
نجار ، جسے اس سے قبل براؤن شوگر کی بازیابی پر گرفتاری اور عدالتی حراست کے بعد معطل کر دیا گیا تھا ، کو محکمہ جاتی کارروائی کا سامنا کرنا پڑا جہاں اس نے الزامات کی تردید کی۔
تاہم ، انکوائری آفیسر نے پولیس ریکارڈ اور شواہد کی جانچ پڑتال کے بعد یہ نتیجہ اخذ کیا کہ اس کا طرز عمل سروس کے قوانین کی خلاف ورزی کرتا ہے اور عوامی فلاح و بہبود کے لیے خطرہ ہے۔
ان نتائج اور سفارشات پر عمل کرتے ہوئے ، مجاز اتھارٹی نے آئین ہند کے آرٹیکل ۳۱۱(۲)کے تحت اختیارات کا استعمال کرتے ہوئے ، انہیں فوری طور پر ملازمت سے برخاست کرنے کا حکم دیا اور انہیں مستقبل کی کسی بھی سرکاری ملازمت سے نااہل قرار دیا۔
اس دوران پولیس نے جموں کی والمیکی کالونی کے نزدیک ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا۔
ایک پولیس ترجمان نے بتایا کہ پولیس اسٹیشن گاندھی نگر کی ایک ٹیم نے والمیکی کالونی کے نزدیک معمول کے گشت کے دوران ایک شخص کو روکا۔انہوں نے کہا کہ تلاشی کے دوران اس کی تحویل سے قریب۹گرام ہیروئن جیسا ممنوعہ مواد بر آمد کیا گیا جس کے بعد اس کی بر سر موقع ہی گرفتاری عمل میں لائی گئی۔
گرفتار شدہ کی شناخت روہن چدھی ولد راج کمار ساکن والمیکی کالونی جموں کے طور پر ہوئی ہے ۔
پولیس ترجمان نے بتایا کہ اس سلسلے میں پولیس اسٹیشن گاندھی نگر میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئی۔انہوں نے کہا کہ جموں پولیس منشیات کی بیخ کنی کو یقینی بنانے کیلئے پر عزم ہے ۔