سی اے ایف اے نیشنز کپ کے ممکنہ کھلاڑیوں میں سنیل چھیتری شامل نہیں: جمیل

ہندوستانی فٹبال ٹیم کے نو منتخب ہیڈ کوچ خالد جمیل نے واضح کیا ہے کہ 29 اگست سے تاجکستان اور ازبکستان میں شروع ہونے والے سی اے ایف اے نیشنز کپ 2025 کے لیے منتخب 35 ممکنہ کھلاڑیوں کی فہرست میں لیجنڈ اسٹرائیکر سنیل چھیتری کا نام شامل نہیں ہے۔
ہندوستان نے وسطی ایشیائی فٹبال ایسوسی ایشن (سی اے ایف اے) کے تحت منعقد ہونے والے اس ٹورنامنٹ میں اپنے ڈیبیو سے قبل 16 اگست کو بنگلورو میں تربیتی کیمپ شروع کیا۔ ہندوستانی ٹیم کو تاجکستان، ایران اور افغانستان کے ساتھ گروپ-بی میں رکھا گیا ہے۔
خالد جمیل نے اتوار کے روزچھیتری کے قومی کیمپ میں شامل نہ ہونے پر کہا:“وہ اس کیمپ میں اس لیے نہیں ہیں کیونکہ ہم ایک ایسا ٹورنامنٹ کھیلنے جا رہے ہیں جو ہمارے ایشین کپ کوالیفائر کی تیاری کے لیے اہم ہوگا۔ سنیل ہندوستانی فٹبال کے عظیم کھلاڑی ہیں۔ میں نے ان کے خلاف کھیلا ہے، کئی بار انہیں کھیلتے دیکھا ہے، اور وہ میرے پسندیدہ کھلاڑیوں میں سے ایک ہیں۔ وہ ہندوستانی فٹبال کے لیے ایک مثال ہیں اور ان کے لیے دروازے ہمیشہ کھلے ہیں۔”
انہوں نے مزید کہا:“میں اس فیفا ونڈو کے دوران کچھ اور کھلاڑیوں کو آزمانا چاہتا ہوں۔ میں نے اس بارے میں ان سے بات کی ہے۔ ٹیم میں ان جیسے کھلاڑی کا ہونا ہمیشہ خوشی کی بات ہوتی ہے۔”