ماسکو//
بدعنوانی کے الزامات ثابت ہونے پر روس کے سابق نائب وزیر دفاع تیمور ایوانوف کو قید کی سزا سنادی گئی۔بین الاقوامی خبر رساں ادارے کی رپورٹ کے مطابق گزشتہ برس اپریل میں روس کے نائب وزیر دفاع تیمور ایوانوف کو حراست میں لیا گیا تھا۔
رپورٹس کے مطابق نائب وزیر دفاع پر 48.4 ملین ڈالر رشوت لینے کا الزام تھا جس کے سبب انہیں عہدے سے بھی برطرف کردیا گیا تھا۔
روسی عدالت کی جانب سے نائب وزیر دفاع کو 13 سال جب کہ ان کے ایک ماتحت انتون فلاتوف کو بھی 12 سال اور چھ ماہ سزا سنائی گئی۔نائب وزیر دفاع نے تفتیش کے دوران ہوشربا انکشافات کیے جس کی روشنی میں مزید ایک درجن افراد کو گرفتار کرلیا گیا۔
رپورٹس کے مطابق مقدمے کی سماعت بند کمرے میں ہونے کے باعث زیادہ تفصیلات سامنے نہیں آسکیں۔ تاہم سرکاری میڈیا نے دعویٰ کیا کہ تمام قانونی تقاضوں کو پورا کیا گیا ہے۔
وزارت قانون و انصاف کے مطابق سابق نائب وزیر دفاع تیمور ایوانوف کو تمام تمام قانونی معاونت فراہم کی گئی۔
ناقدین کا ماننا ہے کہ روسی صدر سے مخالفت کی وجہ سے سابق نائب وزیر دفاع کو اس کیس کا سامنا کرنا پڑ رہا ہے۔
