ویسٹ انڈیز کی خواتین ٹیم نے جنوبی افریقہ کو چھ وکٹوں سے ہرایا

کیو ہل//کپتان ہیلی میتھیوز (65 رنز/ایک وکٹ) کی شاندار کارکردگی کی بدولت ویسٹ انڈیز نے تیسرے ٹی ٹوئنٹی میچ میں جنوبی افریقہ کو چھ وکٹوں سے شکست دے دی۔
اس کے ساتھ ہی ویسٹ انڈیز نے تین میچوں کی سیریز بھی 2-1 سے اپنے نام کر لی۔
جنوبی افریقہ کے 148 رنز کے ہدف کا تعاقب کرتے ہوئے ویسٹ انڈیز کا آغاز اچھا نہیں رہا اور اس نے 32 رنز پر اپنی دو وکٹیں گنوا دیں۔ کیانا جوزف (6) اور ریلیانا گریمونڈ (5) رنز بنا کر آؤٹ ہوئیں۔بلے بازی کرنے آئیں شمین کیمبل نے کپتان ہیلی میتھیوز کے ساتھ اننگ کو سنبھالا اور تیسری وکٹ کے لیے 82 رنوں کی شراکت کرکے اپنی ٹیم کو ف جیت کی دہلیز پر پہنچا یا۔ 16ویں اوور میں ماریزان کپ نے اپنی ہی گیند پر شمین کیمبل کو کیچ آؤٹ کرکے اس شراکت داری کا خاتمہ کردیا۔ کیمبل نے 38 گیندوں میں دو چوکوں اور ایک چھکا کی مدد سے (42) رنز بنائے۔ 18ویں اوور میں سن لوئس نے ہیلی میتھیوز کو بولڈ کرکے ویسٹ انڈیز کو بڑا جھٹکا دیا۔ ہیلی میتھیوز نے 50 گیندوں میں نو چوکوں اور ایک چھکا کی مدد سے (65) رنوں کی اننگ کھیلی۔ شینیل ہنری 11 گیندوں میں (20) رنز بنانے کے بعد ناٹ آؤٹ رہیں۔ ویسٹ انڈیز نے 18.3 اوورز میں چار وکٹوں پر 148 رنز بنا کر چھ وکٹوں سے میچ جیت لیا۔
جنوبی افریقہ کی جانب سے ماریزان کپ نے دو وکٹیں حاصل کیں۔ سن لوس اور اے کھاکا نے ایک ایک بلے باز کو آؤٹ کیا۔ میچ میں 65 رنز بنانے اور ایک وکٹ لینے والے ہیلی میتھیوز کو ‘پلیئر آف دی میچ اور سیریز میں بھی عمدہ کارکردگی کا مظاہرہ کرنے والی ویسٹ انڈیز کے کپتان ہیلی میتھیوز کو ‘پلیئر آف دی سیریز سے نوازا گیا۔
اس سے قبل جنوبی افریقہ نے پیر کی رات ٹاس جیت کر پہلے بلے بازی کرنے کا فیصلہ کیا۔بلے بازی کرنے اتری جنوبی افریقہ نے مقررہ 20 اوورز میں چھ وکٹوں کے نقصان پر 147 رنز بنائے۔ کپتان لورا وولفارٹ نے 24 گیندوں پر (28)، تیجمن برٹس (20) اور سن لوس (13) نے رنز بنائے۔ میان اسمٹ نے 38 گیندوں میں سات چوکے اور ایک چھکا لگاتے ہوئے (59 ناٹ آؤٹ) رنز کی اننگ کھیلی۔ این ڈی کلارک (پانچ ) رن بنانے کے بعد ناٹ آؤٹ رہیں۔ ویسٹ انڈیز کی جانب سے کرشمہ رامہراک اور ایفی فلیچر نے دو دو وکٹیں حاصل کیں۔ ایس ہیکٹر اور ہیلی میتھیوز نے ایک ایک بلے باز کو آؤٹ کیا۔