ہندوستان کی خواتین ہاکی ٹیم ایشیا کپ میں تھائی لینڈ کے خلاف اپنی مہم کا آغاز کرے گی

نئی دہلی// ہندوستانی خواتین ہاکی ٹیم ایشیا کپ 2025 میں پانچ ستمبر کو تھائی لینڈ کی ٹیم کے خلاف اپنی مہم کا آغاز کرے گی۔
چین کے ہانگژو میں پانچ سے 14 ستمبر تک جاری رہنے والے ٹورنامنٹ میں ہندوستان کی خواتین ٹیم کو پول بی میں موجودہ ایشیا کپ چیمپئن جاپان، تھائی لینڈ اور سنگاپور کے ساتھ رکھا گیا ہے۔ جبکہ پول اے میں میزبان چین، کوریا، ملائیشیا اور چینی تائی پے شامل ہیں۔
خواتین ایشیا کپ کے حوالے سے ہندوستان کی ٹیم کی کپتان سلیمہ ٹیٹے نے کہا، "ہم خواتین ایشیا کپ میں اپنی مہم شروع کرنے کے لیے پرجوش ہیں۔ موجودہ چیمپئن جاپان کے ساتھ پول بی میں رکھا جانا شروع سے ہی ہماری صلاحیتوں اور کردار کی آزمائش کرے گا۔ پول مرحلے میں خود کو جانچنے کا ایک شاندار موقع ہوگا۔ ہماری توجہ ا سمارٹ، نظم و ضبط والی ہاکی کھیلنے پر مرکوز ہوگی اور حتمی ہدف ٹرافی اٹھانا ہے۔”
ایشیا کپ 2025 پول بی میچوں کے لیے ہندوستان شیڈول اس طرح ہے: ہندوستان کا پہلا مقابلہ پانچ ستمبر کو تھائی لینڈ سے، چھ ستمبر کو جاپان سے، اور آٹھ ستمبر کو سنگاپور سے ہوگا۔