پنجاب کنگز ممبئی انڈینز کو شکست دے کر آئی پی ایل فائنل میں

احمد آباد// کپتان شریئس ایر (87 ناٹ آؤٹ) اور نہال ودھیرا (48) کی شاندار اننگز کی بدولت پنجاب کنگز نے بارش سے متاثرہ انڈین پریمیئر لیگ (آئی پی ایل) 2025 کے دوسرے کوالیفائر میں اتوار کو ممبئی انڈینز کو چھ گیندیں باقی رہتے پانچ وکٹوں سے شکست دے کر فائنل میں داخلہ حاصل کر لیا۔ بارش کے باعث میچ دو گھنٹے 15 منٹ تاخیر سے شروع ہوا۔ اب فائنل میں پنجاب کنگز کا مقابلہ رائل چیلنجرز بنگلور (آرسی بی) سے ہوگا۔
204 رنوں کے ہدف کے تعاقب میں پنجاب کنگز کی شروعات اچھی نہیں رہی اور تیسرے ہی اوور میں پربھ سمرن سنگھ (6) کا وکٹ گنوا بیٹھی۔ اس کے بعد بیٹنگ کے لیے آنے والے جوش انگلس نے پریانش آریہ کے ساتھ مل کر اننگز سنبھالنے کی کوشش کی۔ دونوں بلے بازوں نے دوسرے وکٹ کے لیے 52 رنز جوڑے۔ چھٹے اوور میں اشونی کمار نے پریانش (20) کو آؤٹ کر کے ممبئی کو دوسری کامیابی دلائی۔ ایسے بحران کے وقت بیٹنگ کے لیے آنے والے کپتان شریئس ایر نے اننگز کو سنبھالا اور تیزی سے رنز بنائے۔ اس دوران جوش انگلس 21 گیندوں پر 38 رنز بنانے کے بعد آٹھویں اوور میں آؤٹ ہوئے۔ نہال وڈھیرا اور ایر کے درمیان 84 رنوں کی شراکت داری ہوئی۔ شریئس ایر نے 19ویں اوور کی آخری گیند پر چھکا لگا کر اپنی ٹیم کو فتح دلائی۔ پنجاب کنگز نے 19 اووروں میں پانچ وکٹ پر 207 رن بنائے اور میچ پانچ وکٹ سے جیت لیا۔ شریئس ایر نے 41 گیندوں میں پانچ چوکے اور آٹھ چھکے لگا کر 87 رنز (ناٹ آؤٹ) کی اننگز کھیلی۔
ممبئی انڈینز کی جانب سے اشونی کمار نے دو وکٹ حاصل کئے۔ ٹرینٹ بولٹ اور ہاردک پانڈیا نے ایک ایک بلے باز کو آؤٹ کیا۔
اس سے قبل پنجاب کنگس کے کپتان شریئس ایر نے آج یہاں ٹاس جیت کر پہلے گیند بازی کرنے کا فیصلہ کیا۔ بلے بازی کے لیے آنے والی ممبئی انڈینس کی شروعات اچھی نہیں تھی اور وہ جلد ہی روہت شرما (آٹھ) کی وکٹ گنوا بیٹھی۔ اس کے بعد بیٹنگ کے لیے آنے والے تلک ورما نے جونی بیرسٹو کے ساتھ اننگز کو سنبھالنے کی کوشش کی۔ تلک ورما نے 29 گیندوں میں دو چوکوں اور دو چھکوں کی مدد سے (44) رنز بنائے۔ سوریہ کمار یادو نے 26 گیندوں میں چار چوکوں اور تین چھکوں کی مدد سے (44) رنز کی اننگز کھیلی۔ جونی بیرسٹو نے 24 گیندوں میں تین چوکوں اور دو چھکوں کی مدد سے (38) اور نمن دھیر نے 18 گیندوں میں سات چوکوں کی مدد سے (37) رنز بنائے۔ راج باوا آٹھ رنز بنانے کے بعد ناٹ آؤٹ رہے۔ ممبئی انڈینس نے مقررہ 20 اوورز میں چھ وکٹوں پر 203 رنز کا بڑا اسکور بنایا۔
پنجاب کنگس کی جانب سے عظمت اللہ عمرزئی نے دو وکٹ حاصل کئے۔ کائل جیمیسن، مارکس اسٹوئنس، وجے کمار ویشاک اور یوزویندر چہل نے ایک ایک بلے باز کو آؤٹ کیا۔