روی شاستری کا بڑا انکشاف، کوہلی نے ٹیسٹ فارمیٹ کیوں چھوڑا؟

نئی دہلی///
کرکٹ کے بادشاہ وراٹ کوہلی نے حال ہی میں ٹیسٹ کرکٹ سے ریٹائرمنٹ کا اعلان کیا تھا جس کے بعد شائقین میں مایوسی اور حیرانی ہے۔ فٹ ترین اور شاندار بلے باز نے اپنے انسٹاگرام پر پوسٹ کرتے ہوئے اپنی ریٹائرمنٹ کی اطلاع دی۔ اس عظیم کھلاڑی کے شاندار سفر کے اختتام پر شائقین اور ماہرین حیران رہ گئے۔ وہیں اب سابق بھارتی کوچ روی شاستری نے چونکا دینے والا انکشاف کیا ہے۔
36 سالہ بیٹنگ لیجنڈ سابق ہندوستانی کپتان وراٹ کوہلی نے 12 مئی 2025 کو ٹیسٹ کرکٹ سے ریٹائرمنٹ کا اعلان کیا تھا جس کے بعد روزنامہ بھاسکر کی رپورٹ کے مطابق شاستری نے آئی سی سی ریویو کو بتایا کہ انہوں نے ریٹائرمنٹ کے اعلان سے ایک ہفتہ قبل کوہلی سے بات کی تھی۔ ان کا مزید کہنا تھا کہ ’کوہلی کا دماغ بالکل صاف تھا، انہیں کوئی پچھتاوا نہیں تھا۔ روی شاستری نے کہا کہ میرا خیال تھا کہ ویرات مزید 2 سے 3 سال تک ٹیسٹ میچ کھیل سکتے تھے۔ جب انہوں نے ریٹائرمنٹ کا اعلان کیا تو میں بہت حیران ہوا۔ شاستری نے مزید کہا کہ کوہلی اپنی ٹیم کے آدھے سے زیادہ کھلاڑیوں سے زیادہ فٹ ہیں، لیکن مسلسل سرخیوں میں رہنے کی وجہ سے ذہنی دباؤ میں تھے۔ انہوں نے کہا، جب آپ ذہنی طور پر تھک جاتے ہیں، تو یہ آپ کے جسم پر ظاہر ہوتا ہے۔
روی شاستری نے کہا کہ کوہلی کو پوری دنیا میں پذیرائی ملی ہے، کوہلی کے دنیا بھر میں کسی بھی کھلاڑی کے مقابلے میں سب سے زیادہ مداح ہیں۔ کوہلی کی جارحیت انہیں دوسرے کھلاڑیوں سے مختلف بناتی ہے۔
کوہلی نے اپنا ٹیسٹ ڈیبیو 2011 میں ویسٹ انڈیز کے خلاف کیا تھا۔ اپنے شاندار کیریئر میں، کوہلی نے 123 ٹیسٹ کھیلے، جس میں 9230 رنز بنائے، جن میں 30 سنچریاں بھی شامل ہیں، جس سے وہ ہندوستان کے عظیم ٹیسٹ بلے بازوں میں سے ایک ہیں۔ ابھی کے لیے، ٹیسٹ کرکٹ کے آئیکون کی شراکت کو ہمیشہ یاد رکھا جائے گا۔