سرینگر ہوائی اڈے سے ۱۰؍ اضافی پروازیں چلائی جائیں گی

سرینگر//
سرینگر کے بین الاقوامی ہوائی اڈے کی پروازوں کے شیڈول میں۱۰؍ اضافی پروازیں شامل کرنے کا فیصلہ کیا گیا ہے۔
ان نئی پروازوں کے ساتھ ہی سرینگر ہوائی اڈے سے جانے والے پروازوں کی تعداد تقریباً ۶۰ ہو جائے گی۔ ائیر پورٹ اتھارٹی آف انڈیا کے مطابق ۱۰ نئی اضافی پروازیں دہلی سرینگر کے درمیان اور ملک کی دیگر شہروں کے لیے اڑان بھریں گی۔
واضح رہے کہ رواں برس موسم سرما کے دوران سرینگر کے بین الاقوامی ہوائی اڈے سے روزانہ شیڈول کے مطابق۳۸ سے۴۴ جہازوں کی آمد و رفت ہوا کرتی تھی لیکن اپریل کے مہینے سے موسم گرما کے لیے اس شیڈول میں تبدیلی عمل میں لائی گئی ہے۔ ایسے میں اب سیاحتی سیزن اور سالانہ امرناتھ یاترا کے مدنظر ۲۶ جون سے ۱۰ جہازوں کے اضافے کے ساتھ ہی فلائٹ آپریشن کو مزید بڑھا دیا گیا ہے۔
۱۰نئی پروازوں کے اضافے کے تعلق سے سرینگر ہوائی اڈے کے ڈائیریکٹر کلدیپ سنگھ کا ٹویٹ سامنے آیا۔ جس میں اضافی پروازوں کو شیڈول پر انہوں نے خوشی کا اظہار کرتے ہوئے کہا کہ نئی پروازوں کو متعارف کرنے سے مسافروں کو آسانی پیدا ہوگی جب کہ دستیاب سہولت سے فائدہ اٹھا کر زیادہ سے زیادہ مسافر ہوائی سفر کر سکیں گے۔
سرینگر ہوائی اڈے کے ذریعے ہر برس۳ء۲ ملین سے زائد مسافر سفر کرتے ہیں لیکن مرکزی حکومت کی جانب سرینگر بین الاقوامی ہوائی اڈے کو گذشتہ برس بڑا ہوائی اڈہ قرار دیا گیا۔
ایئر پورٹ اتھارٹی آف انڈیا کے اعداد و شمار کے مطابق موسم گرما کے دوران۳۰ لاکھ مسافروں کی تعداد بڑھ کر سالانہ ۲ء۵ ملین ہونے کی توقع کی جارہی ہے۔