باندھ ٹوٹ جانے سے بمنہ کے کئی علاقے ڈوب گئے

سرینگر//
سیلابی صورتحال کے بیچ بمنہ میں باندھ ٹوٹ جانے کے باعث سیلابی پانی رہائشی مکانوں میں گھس گیا جس وجہ سے لوگوں کو محفوظ مقامات کی اور منتقل کیا جارہا ہے ۔
یو این آئی اردو کے نامہ نگار نے بتایا کہ سرینگر کے گوری پورہ اور خمینی چوک بمنہ میں باندھ ٹوٹ جانے کے باعث سیلابی پانی رہائشی مکانوں میں گھس جانے سے علاقے میں افرا تفری کا ماحول پھیل گیا۔
نامہ نگار نے بتایا کہ اگر چہ مقامی نوجوانوں نے باندھ کو بچانے کی انتھک کوشش کی تاہم موسلا دھار بارشوں اور نالے میں پانی کی سطح بلند ہونے کے باعث باندھ ٹوٹ گیا اور دیکھتے ہی دیکھتے گوری پورہ اور خمینی چوک بمنہ کی پوری بستی ستی سر میں تبدیل ہو گئی۔
نامہ نگار نے بتایا کہ مقامی لوگوں اور رضا کاروں کی جانب سے رہائشی مکانوں میں پھنسے ہوئے لوگوں کو محفوظ مقامات کی اور منتقل کرنے کا سلسلہ جاری ہے ۔
مقامی لوگوں نے بتایا کہ ڈرینج سسٹم ناکارہ ہونے اور نالے کی باندھوں کی مرمت نہ کرنے کے باعث علاقے میں یہ صورتحال پیدا ہو گئی ہے ۔
اُن کا کہنا تھا کہ سال ۲۰۱۴میں آئے تباہ کن سیلاب کے بعد مقامی لوگوں نے انتظامیہ سے باندھوں کی مرمت اور ڈرینج سسٹم کو ٹھیک کرنے کے حوالے سے کئی بار مطالبہ کیا تاہم لوگوں کی آواز صدا بہ صحرا ثابت ہو رہی ہے ۔
مقامی لوگوں نے بتایا کہ سیلاب سے اُن کی قیمتی اشیاء اور رہائشی مکانات کو نقصان پہنچا ہے ۔
دریں اثنا پولیس اور سیول انتظامیہ کے آفیسران علاقے میں خیمہ زن ہے اور وہ صورتحال کا از خود جائزہ لے رہے ہیں۔