بدھ تک سرینگر جموں قومی شاہراہ کی جزوی بحالی کا امکان:جتندر سنگھ

جموں//
مرکزی وزیر ڈاکٹر جتندر سنگھ نے منگل کے روز کہا ہے کہ جموں کشمیر کے ضلع رامبن میں شدید بارشوں، طوفانی ہواؤں اور بادل پھٹنے کے بعد شروع کی گئی راحتی کارروائیاں زور و شور سے جاری ہیں اور ضلعی انتظامیہ مشکل ترین حالات کے باوجود بہترین کارکردگی کا مظاہرہ کر رہی ہے ۔
مرکزی وزیر نے کہا بدھ تک سرینگر جموں قومی شاہراہ پر جزوی طورپر ٹریفک کی بحالی کا امکان ہے ۔
ڈاکٹر سنگھ نے سوشل میڈیا پلیٹ فارم’ایکس‘پر ایک پوسٹ میں کہا’’راحت رسانی کا کام پوری رفتار کے ساتھ جاری ہے ۔ انتظامیہ انتہائی مشکل حالات کے باوجود بہتر کام کر رہی ہے ۔ ضلع ترقیاتی کمشنر بصیر چودھری خود متاثرہ علاقوں میں خیمہ زن ہیں اور صورتحال پر براہ راست نگرانی رکھے ہوئے ہیں‘‘۔
ڈاکٹر سنگھ نے مزید کہا کہ رام بن ضلع میں بجلی اور پانی کی فراہمی کی بحالی پر خصوصی توجہ دی جارہی ہے ۔
مرکزی وزیر کے مطابق، ‘ضلع میں کل۱۷۶۲ڈسٹری بیوشن ٹرانسفارمرز میں سے۱۴۸۶کی مرمت مکمل ہو چکی ہے اور باقی۲۸۶ٹرانسفارمرز پر کام جاری ہے ۔ اسی طرح‘۹۸واٹر سپلائی اسکیمز میں سے۸۹کو مکمل طور پر فعال کر دیا گیا ہے جبکہ۹اسکیموں کی بحالی کا کام تیزی سے جاری ہے ۔
ڈاکٹر سنگھ نے مزید کہا کہ قومی شاہراہ کی مکمل بحالی میں وقت لگ سکتا ہے ، تاہم اس کی جزوی بحالی کل تک ممکن ہے تاکہ ٹریفک کا کم از کم بہاؤ شروع کیا جا سکے ۔مرکزی وزیر نے اعلان کیا کہ وہ کل رامبن کے ضلعی ہیڈکوارٹر کا دورہ کریں گے تاکہ انتظامیہ کے ساتھ مزید ضروری اقدامات پر بات چیت کر کے اگلے مرحلے کی حکمت عملی طے کی جا سکے ۔
یاد رہے کہ اتوار کے روز رامبن میں شدید بارشوں اور بادل پھٹنے کے نتیجے میں بڑے پیمانے پر تباہی ہوئی تھی، جس کے بعد سے انتظامیہ اور سیکیورٹی ادارے ریلیف اور بحالی کے عمل میں مصروف ہیں۔
دریں اثنا ضلعی انتظامیہ کے ایک سینئر عہدیدار نے خبر رساں ایجنسی کو بتایا کہ رام بن میں بادل پھٹنے کے نتیجے میں ایک درجن کے قریب بستیاں متاثر ہوئی ہیں۔انہوں نے کہاکہ تین سو کے قریب مکانوں اور دکانوں کو نقصان پہنچنے کے ساتھ ساتھ چار سو گاڑیاں تباہ ہوئی ہیں۔ ان کے مطا بق متاثرین کی مدد اور انہیں معاوضہ فراہم کرنے کی خاطر ہنگامی بنیادوں پر اقدامات کئے جارہے ہیں۔