کسانوں کا ڈیجیٹل آئی ڈی بنوانا ضروری : شیوراج

نئی دہلی// زراعت اور کسانوں کی فلاح و بہبود کے مرکزی وزیر شیوراج سنگھ چوہان نے کسانوں سے ڈیجیٹل شناختی کارڈ (آئی ڈی) بنوانے کی اپیل کرتے ہوئے کہا ہے کہ اس سے سرکاری اسکیموں کا فائدہ اٹھانا آسان ہو جائے گا اور کسان خود کفیل ہو جائیں گے ۔
مدھیہ پردیش کے ودیشا میں آج کسانوں کے ساتھ بات چیت کرتے ہوئے مسٹر چوہان نے کہا کہ وزیر اعظم نریندر مودی کی قیادت میں حکومت نے ڈیجیٹل زراعت مشن شروع کیا ہے ، جس کا مقصد کسانوں کو ڈیجیٹل طور پر بااختیار، خود انحصار اور ٹیکنالوجی کے قابل بنانا ہے ۔ اس موقع پر مسٹر چوہان نے ڈیجیٹل ایگریکلچر مشن کے تحت بنائی گئی اپنی کسان آئی ڈی بنوائی ۔
مسٹر چوہان نے کہا کہ اس اہم مشن کے تحت تمام کسانوں کی ڈیجیٹل شناخت ہوگی۔ انہیں ایک شناختی کارڈ فراہم کیا جائے گا اور کسانوں کی کھیتی سے متعلق دیگر تمام معلومات ایک جگہ پر دستیاب ہوں گی۔ اس میں زمین، رقبہ، خاندان اور اراکین خاندان ، فصل، کھیت کی مٹی کی صحت، مٹی کے عناصر، سوائل کارڈ، مویشیوں اور جائیداد کے بارے میں معلومات ہوں گی۔
مرکزی وزیر نے کہا کہ اس کا سب سے بڑا فائدہ یہ ہے کہ اب کسانوں کو ہر اسکیم کے فوائد حاصل کرنے کے لیے مختلف جگہوں پر رسمی کارروائیاں مکمل کرنے کی ضرورت نہیں پڑے گی۔ انہوں نے کہا کہ پیسہ براہ راست وزیر اعظم کسان سمان ندھی سے اکاؤنٹ میں آئے گا۔ انہوں نے کہا کہ اس بات کو یقینی بنانے کے لیے کہ زراعت سے متعلق اور دیگر اسکیموں کا فائدہ کسانوں تک صحیح طریقے سے پہنچے ، کسانوں کے لیے فارمر آئی ڈی بنوانا ضروری ہے ۔ مرکزی حکومت اور ریاستی حکومت مل کر کسان آئی ڈی بنانے کی مہم چلا رہی ہے ۔ انہوں نے کہا کہ آئی ڈی میں دی گئی معلومات کو خفیہ رکھا جائے گا اور اگر کسان چاہے گا تب ہی شیئر کیا جائے گا۔
مسٹر چوہان نے بتایا کہ اب تک ملک میں 5.5 کروڑ سے زیادہ کسانوں کے آئی ڈی بنائے جا چکے ہیں، جن میں مدھیہ پردیش کے 78 لاکھ کسان بھی شامل ہیں۔ انہوں نے کسانوں سے اپیل کی ہے کہ وہ تمام اسکیموں کا فائدہ ایک ہی جگہ پر حاصل کرنے کے لیے کسان آئی ڈی بنوائیں۔