اگنی پتھ کے خلاف ’بھارت بند‘ کا ملک بھر میں بڑے پیمانے پر اثر، دہلی میں کانگریس کا ٹرین روک کر احتجاج

نئی دہلی//
مرکز کی طرف سے فوج میں بھرتی کے لیے لائی گئی اگنی پتھ اسکیم کے خلاف آج ’بھارت بند‘ کی کال دی گئی ہے۔ اس ’بھارت بند‘ کو کانگریس کی حمایت بھی حاصل ہے۔ اس کا اثر ملک بھر میں نظر آیا۔
راجدھانی دہلی میں اگنی پتھ اسکیم کے خلاف احتجاج کرنے والے یوتھ کانگریس کے کارکنوں نے دہلی کے تلک برج ریلوے اسٹیشن پر ٹرین روک کر احتجاج کیا۔ اس دوران پولیس نے انہیں وہاں سے ہٹانے کے لیے طاقت کا استعمال کیا اور کئی کارکنوں کو حراست میں لے لیا۔
اس کے علاوہ ’تاناشاہی نہیں چلے گی‘ کے نعروں کے ساتھ کئی کانگریس کارکنان دہلی کے دل کہے جانے والے کناٹ پلیس کے آؤٹر سرکل پر بیٹھ گئے اور پرامن طریقہ سے مرکز کی اس بھرتی اسکیم کے خلاف احتجاج درج کرایا۔ اس دوران وہاں کئی کلومیٹر لمبا جام لگ گیا۔ جام کی کچھ ایسی ہی تصویر دہلی-گڑگاؤں بارڈر پر بھی نظر آئی۔ جہاں دہلی پولیس نے گاڑیاوں کی تلاشی لی۔ اس دوران سڑکوں پر دور دور تک گاڑیوں کی قطاریں نظر آئیں۔
صرف دہلی بلکہ ملک کی کئی ریاستوں میں بھارت بند کا کافی اثر دیکھا گیا۔ کئی ریاستوں میں سیکورٹی سخت کر دی گئی ہے۔ بہار کے 20 اضلاع میں انٹرنیٹ بند کر دیا گیا ہے۔ اس کے ساتھ ہی دارالحکومت دہلی سے متصل اتر پردیش کے نوئیڈا میں دفعہ 144 نافذ کر دی گئی ہے۔
فوج میں بھرتی کے لیے اگنی پتھ اسکیم کے خلاف گزشتہ کئی دنوں سے ملک بھر میں زبردست احتجاج ہو رہا ہے۔ نوجوانوں کے اس احتجاج کی وجہ سے کئی ریاستوں میں حالات پرتشدد بھی ہوتے جا رہے ہیں۔ کئی ٹرینیں جل گئیں۔ ریلوے اسٹیشنوں کو آگ لگا دی گئی اور توڑ پھوڑ کی گئی۔ مختلف اسٹیشنوں پر مسافر پھنسے ہوئے ہیں اور پریشان ہیں۔
خیال رہے کہ مرکزی حکومت نے 14 جون کو بری فوج، بحریہ اور فضائیہ میں بھرتی کے لئے اگنی پتھ اسکیم کو متعارف کرایا تھا۔ اس اسکیم کے تحت 17.5 سال سے 21 سال کی عمر کے مرد اور خواتین کو چار سال کی قلیل مدت کے لئے بھرتی کیا جانا ہے۔ بعد میں اس عمر کو ایک بار کے لئے بڑھا 23 سال کر دیا گیا۔ اس اسکیم کی پورا ملک مخالفت کر رہا ہے۔ حکومت سے ملک کا مستقبل کہے جانے والے نوجوانوں کا سوال ہے کہ چار سال کے بعد ان کا کیا ہوگا لیکن اس کا جواب حکومت کے پاس بھی نہیں ہے۔