کٹرا میں مسافروں کو ٹرین تبدیل کرنے کی کسی تجویز کی حمایت نہیں کی جائیگی :عمر

سرینگر//
وزیر اعلیٰ عمرعبداللہ نے کہا ہے کہ کٹرا ریلوے اسٹیشن پر دہلی سے آ رہے مسافروں کو ٹرین تبدیل کرنے کی کسی بھی تجویز کی حمایت نہیں کی جائیگی ۔عمر عبداللہ کا ساتھ ہی کہنا تھا کہ فی الحال ایسی کوئی تجویز بھی زیر غور نہیں ہے ۔
اس سے پہلے ایک مقامی خبر رساں ایجنسی نے وزیر اعلیٰ سے منسوب ایک بیان میں کہا تھا کہ عمرعبداللہ نے حفاظتی اقدامات کیلئے کٹرا میں ٹرین تبدیل کرنے کی تجویز کی حمایت کی ہے ۔
آج شام ایکس پر ایک پوسٹ میں وزیر اعلیٰ نے کہا ’’کسی بھی غلط فہمی کے کسی بھی امکان کو دور کرنے کے لئے، جبکہ ہم ٹرین اور اس کا استعمال کرتے ہوئے سفر کرنے والے مسافروں کو محفوظ بنانے کی ضرورت کو سمجھتے ہیں، مسافروں کو ٹرینیں تبدیل کرنے پر مجبور کرنا ٹرین کے مقصد کو شکست دے گا اور ہزاروں کروڑ روپے کی سرمایہ کاری کو بے معنی بنا دے گا‘‘۔
پوسٹ میںوزیر اعلیٰ کا مزید کہنا تھا ’’کٹرا یا جموں میں ٹرین / مسافروں کو یقینی طور پر چیک کریں لیکن ٹرین کی کوئی تبدیلی ہماری طرف سے حمایت نہیں کی جائے گی‘‘۔ انہوں نے کہا کہ کوئی ٹھوس تجویز نہیں ہے اور جب ہوگی تو ہم اپنی رائے / تجاویز دیں گے۔
اس سے پہلے ایک مقامی خبر رساں ایجنسی نے وزیر اعلیٰ سے منسوب ایک بیان میں کہا تھا کہ عمرعبداللہ نے مسافروں کی حفاظت کو ترجیح قرار دیتے ہوئے کہا کہ اگر کٹرا ریلوے اسٹیشن پر ٹرینوں کے تبادلے سے ان کی حفاظت کو یقینی بنایا جاتا ہے تو لوگوں کو اس پر اعتراض نہیں کرنا چاہئے۔
ایجنسی کے مطابق اتوار کو صحافیوں سے بات چیت کرتے ہوئے وزیر اعلیٰ نے کہا’’اگر سیکورٹی خدشات ہیں تو مجھے نہیں لگتا کہ کوئی اعتراض ہونا چاہئے۔ بہرحال، جو بھی ٹرین سے سفر کرتا ہے، وہ ان کی حفاظت اور سلامتی کا خواہاں ہے، اور ہم بھی‘‘۔
ایجنسی کے مطابق عمر نے کہا کہ جب تک خطہ مکمل طور پر معمول پر نہیں آ جاتا، اس طرح کے اقدامات قابل قبول ہونے چاہئیں۔ان کاکہنا تھا’’اگر یہ کسی بھی خطرے کو ٹالنے کے لئے ہے تو یہ ٹھیک ہے۔ آخر کار یہ ریلوے حکام پر منحصر ہے کہ وہ فیصلہ کریں اور مجھے امید ہے کہ وہ جو بھی فیصلہ کریں گے وہ عوام کو ذہن میں رکھتے ہوئے کیا جائے گا‘‘۔
اس موقع پروزیر اعلیٰ نے کہا کہ لوگ۴ء۶کلو میٹر طویل زیڈ موڑ ٹنل کے افتتاح کے لیے بے صبری سے انتظار کر رہے ہیں اور یہ ٹنل سونہ مرگ میں سیاحت کے فروغ کے لیے معاون ثابت ہوگی۔
عمرعبداللہ نے کہاکہ اب ہم لداخ کو جوڑنے والی زوجیلا ٹنل کے منتظر ہیں جس پر گزشتہ کئی سالوں سے کام چل رہا ہے ۔
ان باتوں کا اظہار وزیر اعلیٰ نے گلمرگ میں نامہ نگاروں سے بات چیت کے دوران کیا۔
وزیر اعلیٰ نے کہاکہ وزیر اعظم نریندر مودی پیر کو سونہ مرگ میں زیڈ موڑ ٹنل کا افتتاح کریں گے اور اس حوالے سے صوبائی انتظامیہ نے تمام تر تیاریاں مکمل کی ہیں۔
عمرعبداللہ نے کہاکہ لوگ زیڈ موڑ ٹنل کے افتتاح کا بے صبری کے ساتھ انتظار کر رہے تھے خاص طور پر سونہ مرگ اورا س کے ملحقہ علاقوں کے رہنے والے لوگ کیونکہ اس ٹنل کی تعمیر سے ان کا سفر آسان ہوگا۔
ان کا مزید کہنا تھا کہ ہماری پوری کوشش رہے گی کہ موسم سرما کے دوران سونہ مرگ میں ونٹر کھیلوں کا انعقاد عمل میں لایا جائے تاکہ اس خطے میں سیاحتی شعبے کو مزید فروغ مل سکے ۔
گلمرگ میں بین الاقوامی پروگرام منعقد کرنے کے بارے میں پوچھے گئے سوال کے جواب میں وزیر اعلیٰ نے کہ اس حوالے سے یہاں مزید کام کرنے کی ضرورت ہے ۔
وزیرا علیٰ نے کہاکہ گلمرگ میں بنیادی ڈھانچے کو بین الاقوامی معیار کے مطابق بنانے کی خاطر زمینی سطح پر اقدامات اٹھانے کی ضرورت ہے ۔
سیاحتی مقام گلمرگ میں کھیلو انڈیا سرمائی کھیلوں کے بارے میں پوچھے گئے ایک اور سوال کے بارے میں عمر عبداللہ نے کہاکہ مسلسل پانچویں سال بھی فروری کے آخر میں گلمرگ میں کھیلو انڈیا گیمز کا انعقاد ہو رہا ہے ۔
عمرعبداللہ نے کہا کہ گلمرگ میں جلد ہی ایک کنونشن سنٹر قائم کیا جائے گا جس سے اس سیاحتی مقام پر بڑے پروگرام منعقد کرنے میں مدد ملے گی۔