لیفٹیننٹ گورنر کا جہلم اور توی فلڈ ریکوری پروجیکٹ کے ۹ پروجیکٹوں کا افتتاح

سرینگر//
لیفٹیننٹ گورنر‘ منوج سنہا نے آج جہلم اور توی فلڈ ریکوری پروجیکٹ ( جے ٹی ایف آر پی ) کے۹ پروجیکٹوں کا افتتاح کیا جو عالمی بینک کی مالی اعانت سے چل رہا ہے ۔
سنہانے اس موقع پر جموں و کشمیر کیلئے اپ گریڈ شدہ بلڈنگ کوڈز کی بھی نقاب کشائی کی ۔ پروجیکٹوں کو جے اینڈ کے اکنامک ری کنسٹرکشن ایجنسی ( جے اینڈ کے ای آر اے ) نے انجام دیا تھا ۔
اس موقع پرلیفٹیننٹ گورنرنے کہا ’’ یہ ہمارا عزم ہے کہ بنیادی ڈھانچے کو تیزی سے جدید بنایا جائے اور لوگوں کیلئے زندگی کی آسانی کو یقینی بنایا جائے ۔ ‘‘
جے ٹی ایف آر پی کے کئی بنیادی ڈھانچے کے منصوبے جو برسوں سے رُکے ہوئے تھے ، مکمل ہو چکے ہیں ۔لیفٹیننٹ گورنرنے کہا کہ یہ دور دراز علاقوں کی تیزی سے توسیع اور جدید کاری ، دیہی صحت کی دیکھ بھال کو مضبوط بنانے اور ہنگامی خدمات کے محکمے کو موثر ردِ عمل کیلئے فعال کرنے کی راہ ہموار کرے گا ۔
سنہا نے کہا کہ عام لوگوں کو عوامی منصوبوں کے ثمرات سے محروم رکھنا جرم ہے ۔ ترقیاتی کاموں کے ثمرات ہر شہری تک پہنچنے چاہئیں اور دستیاب وسائل اور فنڈز کو لوگوں کی امنگوں کو پورا کرنے کیلئے استعمال کیا جانا چاہئیے ۔
لیفٹیننٹ گورنرنے کہا کہ جموں کشمیر میں ڈیزاسٹر منیجمنٹ سسٹم کو مضبوط بناتے ہوئے نئے پروجیکٹ لوگوں کی زندگیوں پر مثبت اثرات مرتب کریں گے ۔
سنہا نے جے اینڈ کے ای آر اے اور جے ٹی ایف آر پی کو ہدایت دی کہ وہ۲۰۱۴ کے سیلاب کے دوران تباہ شدہ پلوں اور سڑکوں کی نشاندہی کریں اور ان کی اپ گریڈیشن اور تعمیراتی کاموں کو ترجیحی بنیادوں پر شروع کریں ۔
لیفٹیننٹ گورنرنے مزید کہا کہ ماہرین کو ایک تفصیلی مطالعہ کرنے ، ضروری مداخلت کرنے اور دریائے جہلم اور توی کیلئے تباہی کے خطرے کو کم کرنے کا ایک مضبوط طریقہ کار تیارکرنے کیلئے تعینات کیا جانا چاہئے ۔
جے ٹی ایف آر پی کے کام کاج کا جائزہ لیتے ہوئے لیفٹیننٹ گورنرکو بتایا گیا کہ گذشتہ دو برسوں کے دوران ورلڈ بینک کی مالی اعانت سے جے ٹی ایف آر پی کے تحت ۷۹ء۴۲۸ کروڑ روپے کی لاگت کے کل۲۱۳ ذیلی منصوبوں میں سے ۱۳۲ ذیلی منصوبے مکمل ہو چکے ہیں جبکہ باقی ۸۱پروجیکٹوں پر عملدرآمد آخری مرحلے میں ہے ۔
چیف سیکرٹری ڈاکٹر ارون کمار مہتا نے جے اینڈ کے ای آر اے اور جے ٹی ایف آر پی کو نئے پروجیکٹوں کیلئے مبارکباد دیتے ہوئے انہیں مشورہ دیا کہ وہ اپنے مکمل شدہ پروجیکٹوں کا ایک مجموعہ مرتب کریں جس میں کئے گئے کام کو نمایاں کیا جائے ۔
الیفٹیننٹ گورنرنے متعلقہ حکام سے مزید کہا کہ وہ مستقبل کا ایک جامع لائحہ عمل تیار کریں اور اس کے موثر نفاذ کیلئے مشن یوتھ اور دیگر اسٹیک ہولڈرز کے ساتھ مل کر تربیتی پروگرام منعقد کرنے کیلئے کام کریں ۔
ڈاکٹر سید عابد رشید شاہ چیف ایگزیکٹو آفیسر جے کے ای آر اے /جے ٹی ایف آر پی نے لیفٹیننٹ گورنرکو۳۵ء۱۳۷ کروڑ روپے کے پروجیکٹوں کے بارے میں بتایا جن کا آج افتتاح کیا گیا ۔
اس موقع پر جے اینڈ کے ای آر اے اور جے ٹی ایف آر پی کے مختلف ونگز کے ڈائریکٹرز ڈاکٹر میناکشی ٹھاکر ۔ مسٹر افتخار اے حکیم ، مسٹر جاوید اقبال بخاری ، مسٹر افتخار احمد وانی ، مسٹر اجے کمار راجو ، مسٹر تصوف امین کے علاوہ کنسلٹنٹس ، پروجیکٹ منیجر اور متعلقہ ایجنسیوں کے دیگر سینئر افسران موجود تھے ۔