پرینکا نے وائناڈ لوک سبھا سیٹ سے چار لاکھ سے زیادہ ووٹوں سے جیت حاصل کی

وائناڈ (کیرالہ)// کانگریس کی جنرل سکریٹری اور یونائیٹڈ ڈیموکریٹک فرنٹ (یو ڈی ایف) کی امیدوار پرینکا گاندھی واڈرا نے ہفتہ کو کیرالہ کی وائناڈ لوک سبھا سیٹ کے ضمنی انتخاب میں 4,08,036 ووٹوں کے بڑے فرق سے کامیابی حاصل کی۔
مسز واڈرا پہلی بار پارلیمنٹ میں داخل ہو رہی ہیں اور انہوں نے اپنے بھائی اور لوک سبھا میں اپوزیشن لیڈر راہل گاندھی کے ریکارڈ مارجن کو بھی توڑ دیا، جنہوں نے اپریل 2024 کے انتخابات میں وائناڈ لوک سبھا حلقہ کے لیے 3,64,422 ووٹ حاصل کیے تھے ۔
تاہم، 2019 کے لوک سبھا انتخابات میں مسٹر راہل گاندھی نے وائناڈ سیٹ سے 4.31 لاکھ ووٹوں کے فرق سے کامیابی حاصل کی تھی۔
مسز واڈرا کو 6,17,942 ووٹ ملے ، جب کہ ان کے حریف اور لیفٹ ڈیموکریٹک فرنٹ (ایل ڈی ایف) کے امیدوار ستین موکیری کو 2,09,906 ووٹ ملے اور نیشنل ڈیموکریٹک الائنس کی امیدوار نویہ ہری داس کو 1,09,202 ووٹ ملے ۔
اپریل 2024 کے لوک سبھا انتخابات میں راہول گاندھی نے ایل ڈی ایف کی امیدوار اینی راجہ کو 3,64,422 ووٹوں کے فرق سے شکست دی۔ کانگریس کے سابق صدر کو 6,47,445 ووٹ ملے تھے ، ایل ڈی ایف کی کمیونسٹ پارٹی آف انڈیا کی قومی خاتون لیڈر اینی راجہ (سی پی آئی جنرل سکریٹری ڈی راجہ کی بیوی) کو 2,83,028 ووٹ ملے اور بی جے پی کے ریاستی صدر کے سریندرن کو 1,41,045 ووٹ ملے ۔
اس دوران کانگریس جنرل سکریٹری پرینکا گاندھی واڈرا کے شوہر رابرٹ واڈرا نے کیرالہ کی وائناڈ لوک سبھا سیٹ سے ووٹوں کی گنتی میں مسز واڈرا کی زبردست برتری پر خوشی کا اظہار کرتے ہوئے کہا کہ عوام نے مسز واڈرا کو بھاری اکثریت سے لوک سبھا میں بھیجنے کا فیصلہ کرکے ان کی محنت کااحترام کیا ہے ۔
مسز واڈرا کے بارے میں جوکیرالہ کی وائناڈ پارلیمانی سیٹ پر تقریباً 3.5 لاکھ ووٹوں کی برتری کے ساتھ آگے چل رہی ہیں، مسٹر واڈرا نے کہا کہ وہ بہت محنتی اور بے حد نڈر ہیں اور انہیں یقین ہے کہ وہ علاقے کے لوگوں کی نمائندگی کریں گی۔ لوک سبھا میں اپنی خواہشات کے مطابق مفادات کے مسائل اٹھائیں گی اور عوامی مسائل حل کریں گی۔
انہوں نے کہا کہ مسز واڈرا سمیت سبھی کو یقین ہے کہ وہ اس سیٹ پر ضمنی انتخاب بھاری مارجن سے جیتیں گی۔ انہوں نے اس کے لیے وائناڈ کے لوگوں کا شکریہ ادا کیا اور یقین ظاہر کیا کہ مسز واڈرا ان کی امیدوں پر پورا اتریں گی۔