انگلینڈ نے ویسٹ انڈیز کو سات وکٹوں سے ہرایا

بارباڈوس//گیند بازوں کی شاندار کارکردگی کے بعد جوس بٹلر (83) اور ول جیکس (38) کی عمدہ بلے بازی کی بدولت انگلینڈ نے دوسرے ٹی 20 میچ میں ویسٹ انڈیز کو سات وکٹوں سے شکست دے دی، اس کے ساتھ ہی انگلینڈ نے پانچ میچوں کی سیریز میں 2-0 کی برتری حاصل کر لی ہے۔
159 رنوں کے ہدف کا تعاقب کرنے اتری انگلینڈ کی شروعات اچھی نہیں رہی اور اس نے پہلے ہی اوور میں فل سالٹ (0) کا وکٹ گنوا دیا۔ انہیں عقیل حسین نے آؤٹ کیا۔ اس کے بعد بلے بازی کے لیے آنے والے کپتان جوس بٹلر نے ول جیکس کے ساتھ مل کر اننگ کو سنبھالا۔ دونوں بلے بازوں کے درمیان دوسرے وکٹ کے لیے 128 رنز کی شراکت ہوئی۔ 13ویں اوور میں روماریو شیفرڈ نے ول جیکس کو آؤٹ کر کے اس شراکت داری کو توڑا۔ ول جیکس نے 29 گیندوں میں پانچ چوکوں اور ایک چھکا کی مدد سے 38 رنز بنائے۔ اسی اوور میں شیفرڈ نے جوس بٹلر کو بھی آؤٹ کر کے پویلین بھیج دیا۔ بٹلر نے 45 گیندوں میں آٹھ چوکے اور چھ چھکے لگا کر 83 رنز بنائے۔ لیام لیونگسٹن (23) اور جیکب بیتھل (تین) رنز بنانے کے بعد ناٹ آؤٹ رہے۔ انگلینڈ نے 14.5 اوورز میں تین وکٹوں پر 161 رنز بناکر سات وکٹوں سے میچ جیت لیا۔ کپتان جوس بٹلر کو 83 رنز کی اننگ کھیلنے پر میچ کا بہترین کھلاڑی قراردیا گیا۔
ویسٹ انڈیز کی جانب سے روماریو شیفرڈ نے دو وکٹیں حاصل کیں۔ عقیل حسین نے ایک بلے باز کو آؤٹ کیا۔
اس سے قبل انگلینڈ نے ٹاس جیت کر گیندبازی کرنے کا فیصلہ کیا۔ بلے بازی کرنے اتری ویسٹ انڈیز کی شروعات بہت خراب رہی اور اس نے 35 کے اسکور پر تین وکٹیں گنوادیں۔ برینڈن کنگ (1)، ایون لیوس (8) اور روسٹن چیز (13) رنز بنانے کے بعد آؤٹ ہوئے۔ 11ویں اوور میں لیام لیونگسٹن نے نکولس پورن (14) کو سالٹ کے ہاتھوں اسٹمپ کروا کر پویلین بھیج دیا۔ شرفن ردرفورڈ (ایک)، گڈاکیش موتی (9) رنز بنانے کے بعد آؤٹ ہوئے۔ کپتان روومین پاول نے ٹیم کی جانب سے 41 گیندوں پر دو چوکوں اور دو چھکوں کی مدد سے 43 رنز کی اننگ کھیلی۔ روماریو شیفرڈ نے 12 گیندوں میں (22) رنز بنائے۔ میتھیو فورڈ (13) اور ٹائرنس ہندس (پانچ) رنز بناکرناٹ آؤٹ رہے۔ ویسٹ انڈیز نے مقررہ 20 اوورز میں آٹھ وکٹوں پر 158 رنز بنائے۔
انگلینڈ کی جانب سے ثاقب محمود، لیام لیونگسٹن اور ڈین موسلے نے دو دو بلے بازوں کو آؤٹ کیا۔ عادل رشید اور جوفرا آرچر کو ایک ایک وکٹ ملا۔