اُدھم پور دھماکہ:’کلیدی ملزم سمیت تین گرفتار‘ دو سٹکی بم آئی ای ڈیز ضبط ‘

جموں//
جموں پولیس نے اُدھم پور دھماکے میں ملوث کلیدی ملزم سمیت تین افراد کو حراست میں لے کر اُن کے قبضے سے سٹکی بم برآمد کرنے کا دعویٰ کیا ہے ۔
آئی جی جموں مکیش سنگھ نے نامہ نگاروں سے بات چیت کے دوران بتایا کہ ۹مارچ۲۰۲۲کو سلاتھیہ چوک اُدھم پور میں سٹکی بم آئی ای ڈی بلاسٹ ہوا جس کے نتیجے میں چاگر کمار عرف جگل ولد ککرو رام ساکن رام نگر کی برسر موقع ہی موت واقع ہوئی جبکہ ۱۷راہگیر زخمی ہوئے ۔
آئی جی نے بتایا کہ پولیس نے اس سلسلے میں ایف آئی آر زیر زیر نمبر ۹۷کے تحت کیس درج کرکے مزید تحقیقات شروع کی اور ڈی ایس پی ہیڈ کواٹر اُدھم پور ساہل مہاجن کی سربراہی میں ایک خصوصی تحقیقات ٹیم کا قیام عمل میں لایا
آئی جی پی کے مطابق تحقیقات کے دوران متعدد افراد کو پوچھ تاچھ کے سلسلے میں گرفتار کیا گیا اور بعد ازاں ایک مشتبہ نوجوان محمد رمضان سوہل ولد محمد اسحاق سوہل ساکن ہالا بوہار دھار رام بن کی گرفتاری عمل میں لائی ۔
سنگھ نے بتایا کہ پوچھ گچھ کے دوران گرفتار شخص نے اعتراف کیا کہ اُس نے پاکستانی ہینڈلر محمد امین ساکن کاٹھوا ٹھاٹھری ڈوڈہ حال پاکستانی زیر قبضہ کشمیر کے کہنے پر سلاتھیہ چوک اُدھم پور میں ایک سٹکی بم آئی ای ڈی نصب کی ۔
آئی جی پی نے مزید بتایا کہ گرفتار نوجوان کا والد محمد اسحاق سوہل لشکر طیبہ کا پاکستانی تربیت یافتہ ملی ٹینٹ تھا اور سال۲۰۰۳میں سیکورٹی فورسز کے ساتھ ہوئے ایک تصادم کے دوران وہ مارا گیا۔
آئی جی جموں کے مطابق گرفتار نوجوان محمد رمضان پاکستانی ہینڈ لرکے ساتھ سوشل میڈیا پر مسلسل رابطے میں تھا اور اُسی کے کہنے پر سلاتھیہ چوک میں آئی ای ڈی نصب کی تھی جس کے بعد وہ گرفتاری سے بچنے کے لئے ایک محفوظ مقام کی اور منتقل ہوا۔انہوں نے کہا کہ گرفتار جنگجو کی نشاندہی پر اور ایک سٹکی بم کو برآمد کرکے ضبط کیا گیا ۔
سنگھ نے بتایا کہ۲۳مارچ۲۰۲۲کے روز محمد رمضان کے بینک کھاتے میں ۳۰ہزا رروپیہ کی رقم جمع ہوئی اور اُس سے یہ رقم بم دھماکے کرانے کی خاطر دی گئی۔انہوں نے بتایا کہ خورشید احمد ولد محمد عبدا للہ پڈر ساکن مولٹا دیسا ڈوڈہ نے پاکستانی ہینڈلرکے کہنے پر رمضان کے بینک کھاتے میں تیس ہزار روپیہ کی رقم جمع کی ۔انہوں نے بتایا کہ خورشید کو بھی بعد میں گرفتار کیا گیا۔
آئی جی پی کے مطابق خورشید کا نزدیکی رشتہ دار بلال احمد بٹ بھی پاکستانی تربیت یافتہ جنگجو تھا۔آئی جی پی نے کہاکہ تیسرے ملزم نثار احمد خان ولدمرحوم غلام محمد خان ساکن دھانی بدرواہ جو کہ ڈوڈہ ضلع میں سال۲۰۰۱سے ۲۰۰۶تک سرگرم رہا ۔انہوں نے بتایا کہ مذکورہ شخص نے پاکستانی ہینڈلرخوبیب کے کہنے پر دو مرتبہ سٹکی بم آئی ای ڈیز حاصل کی۔
اُن کے مطابق تیسرے ملزم کی نشاندہی پر کرساری بدرواہ کے جنگلی علاقے سے ایک سٹکی بم آئی ای ڈی برآمد کرکے ضبط کی گئی ۔آئی جی پی نے مزید بتایا کہ تحقیقات کا دائرہ وسیع کیا گیا اور مزید گرفتاریوں کو خارج از امکان قرار نہیں دیاجاسکتا۔