جماعت اسلامی کے لئے پہلے الیکشن حرام تھا اور اب حلال ہوگیا :عمر عبداللہ

سرینگر//
جموںکشمیر نیشنل کانفرنس کے نائب صدر عمر عبداللہ نے منگل کے روز کہاکہ ماضی میں جماعت اسلامی الیکشن کو حرام تصور کرتی تھی اب اُن کے لئے چناو حلال ہو گیا ہے ۔
این سی نائب صدر نے کہاکہ ہم چاہتے ہیں کہ جماعت اسلامی پر عائد پابندی کو ہٹایا جائے ۔
ان باتوں کا اظہار عمرنے پہلگام میں نامہ نگاروں سے بات چیت کے دوران کیا۔
سابق وزیر اعلیٰ نے کہاکہ نیشنل کانفرنس کا یہ موقف رہا ہے کہ جمہوری طریقے سے ہی سبھی مسائل حل ہونگے ۔
عمر عبداللہ کے مطابق جماعت اسلامی کے لئے پہلے الیکشن حرام تھا اور اب حلال ہو گیا ہے ، گزشتہ ۳۰برسوں کے دوران جماعت اسلامی کے سوچ میں بدلاو آیا ہے جو نیک شگون ہے ۔
ان کے مطابق ہم چاہتے تھے کہ جماعت اسلامی اپنے نشان پر الیکشن لڑے تاہم دہلی سے فیصلہ نہیں آیا اب جماعت نے آزاد امیدواروں کو میدان میں اتارا ہے ۔
این سی صدر نے ایک سوال کے جواب میں کہاکہ پیپلز کانفرنس بی جے پی کی ذیلی تنظیم ہے اور اب اگر عوامی اتحاد پارٹی کی مدد کرنے کے بارے میں کہا جارہا ہے تو ووٹرز خود بخود طے کریں کہ انہیں کس کو ووٹ دینا ہے ۔
عمرعبداللہ نے مزید بتایا کہ جموں وکشمیر میں اگلی حکومت کانگریس اور نیشنل کانفرنس بنانے میں کامیاب ہو جائے گی۔