سروری نے اندروال سے بہ حیثیت آزادا میدوار پرچہ نامزدگی داخل کیا

کشتواڑ/جموں//
ڈیموکریٹک پروگریسو آزاد پارٹی (ڈی پی اے پی) کے نائب صدر‘ غلام محمد سروری نے منگل کو ضلع کشتواڑ کی اندروال سیٹ سے آزاد امیدوار کے طور پر اپنا پرچہ نامزدگی داخل کیا اور کہا کہ وہ اسمبلی انتخابات لڑنے کے عوام کے مطالبے کو نظر انداز نہیں کر سکتے۔
تاہم سابق وزیر نے ڈی پی اے پی سربراہ غلام نبی آزاد کے ساتھ کسی بھی قسم کے اختلافات سے انکار کرتے ہوئے اس بات کی تصدیق کی کہ آزاد ان کے رہنما رہیں گے۔
ڈی پی اے پی نے اتوار کو آئندہ اسمبلی انتخابات کیلئے۱۳؍ امیدواروں کی اپنی پہلی فہرست جاری کی تھی ، لیکن آزاد کے وفادار سروری اور جوگل کشور شرما کے نام غائب تھے۔
سروری نے کہا’’میں نے اندروال حلقہ سے آزاد امیدوار کے طور پر پرچہ نامزدگی داخل کیا ہے۔ ہم اس خطے کے لوگوں کے لئے کام کر رہے ہیں اور کرتے رہیں گے۔ میں نے اندروال کے لوگوں کے فیصلے پر عمل کیا اور ان کے مطالبے کو نظر انداز نہیں کر سکا‘‘۔
چار مرتبہ اندروال سیٹ کی نمائندگی کرنے والے سروری نے اس بات پر زور دیا کہ ٹکٹ نہ ملنے پر پارٹی یا اس کے لیڈر کے ساتھ ان کا کوئی اختلاف نہیں ہے۔
سورری کاکہنا تھا’’آزاد سے میرا کوئی اختلاف نہیں ہے۔ وہ میرا لیڈر ہے۔ مجھے لوگوں نے اندروال سے الیکشن لڑنے پر مجبور کیا۔ انہوں نے مجھے یقین دلایا ہے کہ ہم یہ الیکشن جیتیں گے۔ میں نے ۲۰۰۲‘۲۰۰۸؍اور۲۰۱۴ میں الیکشن لڑا اور ان لوگوں کی حمایت کی بدولت ہر بار جیت گیا‘‘۔
ڈی پی اے پی رہنما نے کہا کہ حلقے کے لوگوں نے ان پر زور دیا کہ وہ آزاد امیدوار کے طور پر انتخاب لڑیں۔’’میں الیکشن لڑنے کے لیے تیار ہوں۔ مینڈیٹ عوام کا ہے، کسی اور کا نہیں‘‘۔
۲۰۲۴ کے پارلیمانی انتخابات میں سروری کی ضمانت کٹھوعہ،ادھم پور سیٹ سے چلی گئی تھی، جس پر مرکزی وزیر جتیندر سنگھ نے تیسری بار کامیابی حاصل کی تھی۔
سروری۲۰۰۲ سے۲۰۱۸ تک اندروال حلقہ سے چار بار ایم ایل اے رہ چکے ہیں۔۲۰۰۸ میں ، انہیں سیاحت ، جنگلات ، اسکولی تعلیم ، سماجی بہبود ، اور صارفین کے امور اور عوامی تقسیم کے وزیر مملکت کے طور پر مقرر کیا گیا تھا۔
سروری پہلے طویل عرصے تک کانگریس سے وابستہ رہے تھے لیکن اگست ۲۰۲۲ میں آزاد کے ساتھ استعفیٰ دے دیا تھا۔
یہ پوچھے جانے پر کہ کیا وہ ڈی پی اے پی سے استعفیٰ دینے کا ارادہ رکھتے ہیں، انہوں نے کہا’’آزاد میرے لیڈر ہیں اور میرے لیڈر رہیں گے‘‘۔
ڈی اے پی اے لیڈر نے اس بات پر زور دیا کہ ان کی توجہ غیر تعلیم یافتہ نوجوانوں کیلئے روزگار کو یقینی بنانے ، منشیات کی لعنت کو ختم کرنے اور جموں و کشمیر میں امن اور معمول کی صورتحال کو یقینی بنانے پر ہوگی۔
بی جے پی کے طارق حسین کین، پی ڈی پی کے شیخ ناصر، کانگریس،این سی اتحاد کے شیخ ظفر اللہ اور آزاد امیدوار پرے لال شرما نے بھی اندروال حلقہ سے اپنے کاغذات نامزدگی داخل کیے۔