ڈرون کو مار گرانے کی بعد پولیس کی ایڈوائزری

جموں//
سیکورٹی فورسز نے دھماکہ خیز مواد سے لدے ڈرون کو مار گرائے جانے کے ایک دن بعد، جموں و کشمیر پولیس نے پیر کو کٹھوعہ ضلع کے رہائشیوں سے کہا کہ وہ گاڑیوں کو چالو کرنے سے پہلے ان کا معائنہ کریں۔
پاکستان سے شمالی کوریا کے ساختہ ایک ڈرون کو بھیجا گیا جس میں سات مقناطیسی یا چپچپا بموں اور اتنی ہی تعداد میں انڈر بیرل لانچر گرینیڈز کے پے لوڈ کے ساتھ جموں و کشمیر پولیس نے اتوار کو بین الاقوامی سرحد کے قریب تلی ہریہ چک علاقے میں مار گرایا۔
پولیس کے ایک اہلکار نے سرحدی قصبے ہیرا نگر علاقے میں لاؤڈ اسپیکر کے ساتھ نصب گاڑی سے اعلان کرتے ہوئے کہا’’ہم مسافر گاڑیوں کے ڈرائیوروں اور کنڈیکٹروں سے درخواست کرتے ہیں کہ وہ اپنی گاڑیوں اور بسوں کو (اسٹارٹ کرنے سے پہلے) اچھی طرح چیک کریں‘‘۔
پولیس نے اتوار کے واقعے کے بارے میں مکینوں کو آگاہ کیا اور کہا’’یہ (مقناطیسی اور چپکنے والے بم) گاڑیوں کو نقصان پہنچانے کیلئے استعمال کیے جاتے ہیں۔ آپ سے گزارش ہے کہ گاڑیوں کو اچھی طرح چیک کریں، خاص طور پر انہیں صبح شروع کرنے سے پہلے‘‘۔
پولیس نے لوگوں سے یہ بھی کہا کہ وہ ایندھن کے ٹینکوں اور لوہے سے بنے گاڑیوں کے پرزہ جات کو چپچپا یا مقناطیسی مواد کیلئے چیک کریں۔مزید، انہوں نے رہائشیوں سے کہا کہ وہ علاقے میں کسی بھی مشکوک سرگرمی کی اطلاع دیں۔
حکام کے مطابق، اتوار کو مار گرایا جانے والا ڈرون اپنی نوعیت کا تیسرا ڈرون تھا جسے پاکستان کی جانب سے جون ۲۰۲۰ سے جموں سیکٹر میں اسلحہ اور گولہ بارود کے پے لوڈ کے ساتھ بھیجا گیا تھا۔