پہلے مرحلے کا نوٹیفکیشن جاری۔۔۔۸؍اضلاع کے ۲۴؍اسمبلی حلقوں میں ۱۸ستمبر کو ووٹ ڈالے جائیںگے

سرینگر//
الیکشن کمیشن آف انڈیا (ای سی آئی) نے منگل کے روز۱۸ستمبر سے شروع ہونے والے جموں وکشمیر اسمبلی انتخابات کے پہلے مرحلے کے لئے نوٹیفکیشن جاری کیا۔
نوٹیفکیشن کے مطابق پہلے مرحلے میں اننت ناگ، پلوامہ، شوپیاں، کولگام، ڈوڈہ، رام بن اور کشتواڑ اضلاع کی۲۴؍اسمبلی نشستوں کی پولنگ ہوگی جبکہ باقی۶۶؍اسمبلی نشستوں کی پولنگ دوسرے اور تیسرے مرحلوں میں ۲۵ستمبر اور یکم اکتوبر کو ہوگی۔
پہلے مرحلے میں کشمیر صوبے میں۱۶نشستوں پامپور، ترال، پلوامہ، راجپورہ،زینہ پورہ، شوپیاں، دمہال ہانجی پورہ، کولگام، دیوسر، ڈورو، کوکرناگ (ایس ٹی)،اننت ناگ (ویسٹ)،اننت ناگ، سری گفوارہ، بجبہاڑہ، شانگس، اننت ناگ (ایسٹ)، پہلگام جبکہ جموں میں اندر وال، کشتواڑ، پڈر،ناگسینی، بھدرواہ، ڈوڈہ، ڈوڈہ (ویسٹ) رام بن اور بانہال نشستوں کی پولنگ ہوگی۔
نوٹیفکیشن کے مطابق امیدوارں کیلئے کاغذات نامزدگی دائر کرنے کی آخری تاریخ ۲۷؍اگست ہے جبکہ ۲۸؍اگست کو کاغذات کی جانچ پڑتال کی جائے گی اور۳۰؍اگست کاغذات نامزدگی واپس نکالنے کی تاریخ مقرر کی گئی ہے ۔
اسمبلی نشستوں کیلئے پولنگ صبح کے۷بجے سے شروع ہو کر شام کے۶بجے اختتام پذیر ہوگی۔
دوسرے مرحلے میں ۲۶نشستوں کیلئے۲۵ ستمبر کو ووٹ ڈالے جائیں گے اور تیسرے اور آخری مرحلے میں ۴۰نشستوں کے لئے یکم اکتوبر کو ووٹ ڈالے جائیں گے۔
قابل ذکر ہے کہ جموں وکشمیر میں ایک دہائی کے بعد اسمبلی انتخابات منعقد ہو رہے ہیں۔
آخری بار۲۰۱۴ میںانتخابات ہوئے تھے تاہم اب ۱۰ سال بعد اسمبلی انتخابات منعقد ہورہے ہیں۔ ۲۰۱۴ میں پی ڈی پی اور بی جے پی نے مخلوط حکومت بنائی جو ۱۹جون ۲۰۱۸ تک جاری رہی جب بی جے پی نے پی ڈی پی کی حمایت واپس لے لی جبکہ محبوبہ مفتی جموں و کشمیر کی وزیر اعلیٰ تھیں۔
جموں و کشمیر کو گورنر کے زیر انتظام صدر راج کے تحت رکھا گیا۔ ۵؍اگست ۲۰۱۹ کو، بی جے پی حکومت نے آرٹیکل۳۷۰ کو ختم کر دیا اور ریاست کو دو مرکز کے زیر انتظام علاقوں میں تقسیم کر دیا۔ تب سے یو ٹی ایک ایل جی اور اس کے اکیلے مشیر کے زیر انتظام ہے۔