نئی دہلی// ہندوستانی فضائیہ کے سربراہ ایئر چیف مارشل وی آر چودھری نے منگل کو حیدرآباد میں ایئر فورس اسٹیشن بیگم پیٹ میں ویپن سسٹم اسکول کا افتتاح کرنے کے بعد کہا کہ اس سے مستقبل کی ضروریات پوری ہوں گی اور یہ فضائیہ کے لیے ایک بڑی چھلانگ ہے ۔
فضائیہ کے سربراہ نے کہا کہ اس سکول کے بننے سے فضائیہ کی تاریخ میں ایک نئے باب کا آغاز ہوا ہے ۔ یہ اسکول فضائیہ میں افسران کی ایک نئی شاخ، ویپن سسٹمز برانچ کی منظوری کے پیش نظر تشکیل دیا گیا ہے ۔ اس وقت کے فضائیہ کے سربراہ نے سال 2022 میں اس شاخ کو شروع کرنے کا اعلان کیا تھا۔
انہوں نے کہا کہ یہ اسکول افسران کو عصری تربیت فراہم کرے گا اور نئی تشکیل شدہ برانچ کے افسران کو فضائیہ کی ضروریات کے مطابق تیار کرے گا۔ انسٹی ٹیوٹ میں فلائٹ کیڈٹس کو دوسرے سمسٹر کی تربیت دی جائے گی۔ نئی برانچ کے چار سلسلے ہیں: سخوئی-30 MKI اور C-130J جیسے ایئر پلیٹ فارمز میں ہتھیاروں اور سسٹمز کو چلانے کے لیے فلائنگ ا سٹریم، دور سے پائلٹ ہوائی جہاز چلانے کے لیے ریموٹ اسٹریم، سطح سے ہوا اور سطح سے سطح تک ہتھیاروں کے نظام کے لیے مشن کمانڈرز اور آپریٹرز، اور خلا پر مبنی انٹیلی جنس اور منظر کشی کو سنبھالنے کے لیے انٹیلی جنس کے سلسلے شامل ہیں ۔
بات چیت کے دوران فضائیہ کے سربراہ نے کہا کہ ویپن سسٹمز برانچ کے قیام سے زمینی اور ماہر ہتھیاروں کے نظام کے آپریٹرز ایک چھتری کے نیچے آجائیں گے جس سے فضائیہ کی جنگی صلاحیتوں میں نمایاں اضافہ ہوگا۔ انہوں نے ٹرینرز پر زور دیا کہ نئی تشکیل شدہ برانچ میں قائدین کی حیثیت سے وہ وہ ستون ہیں جن پر تربیتی نظام کی پوری عمارت مضبوطی سے کھڑی ہوگی اور ملک کو فیصلہ کن فضائی طاقت فراہم کرے گی۔ا سکول کے بانی ارکان کو سراہتے ہوئے آرمی چیف نے تمام اہلکاروں پر زور دیا کہ وہ سکول کو ملک میں ہتھیاروں کے نظام کی تربیت کے نوڈل مرکز کے طور پر قائم کریں۔