جموں//
بھارتیہ جنتاپارٹی(بی جے پی) کے قومی جنرل سیکریٹری ترون چگ نے منگل کے روز کہاکہ عبداللہ ، مفتی ، گاندھی اور نہرو خاندان نے جموں وکشمیر کا بیڑا غرق کیا ۔
چگ نے کہاکہ ان خاندانوں کی وجہ سے ہی جموں وکشمیر کے لوگوں کو مشکلات و مصائب کے ایام دیکھنے پڑے لیکن مودی جی نے دفعہ ۳۷۰کو منسوخ کرکے جموں وکشمیر کو امن کا گہوارا بنایا۔
اطلاعات کے مطابق جموں وکشمیر بھارتیہ جنتاپارٹی کی ایک اعلیٰ سطحی میٹنگ جموں میں منعقد ہوئی جس میں آنے والے پارلیمانی انتخابات کے حوالے سے امیدواروں کے ناموں پر غور وغوض ہوا۔
میٹنگ کے بعد نامہ نگاروں سے بات چیت کے دوران بی جے پی کے قومی جنرل سیکریٹری نے کہاکہ ماضی میں جموں وکشمیر کو ٹیررزم دارلخلافہ کے طورپر جانا جاتا تھا لیکن آج یہ ٹورازم دارلخلافہ کے طور پر ابھر کر سامنے آیا ہے ۔
چگ نے کہاکہ تین پریوار عبداللہ ، مفتی ، گاندھی اور نہرو نے جموں وکشمیر کو تباہی کے دہانے پر پہنچایا ۔ان کے مطابق عبداللہ‘ مفتی اور کانگریس کے دور میں یہاں پر نوجوانوں کا خون بہایا جارہا تھا لیکن آج جموں وکشمیر میں حالات پوری طرح سے معمول پر آئے ہیں۔
بی جے پی کے قومی جنرل سیکریٹری نے کہاکہ جموںکشمیر کو بہت آگے بڑھنا ہے یہاں نوجوانوں کو روزگار فراہم کرنے کی خاطر زمینی سطح پر اقدامات اٹھائے جارہے ہیں۔
جموں وکشمیر کی پانچ پارلیمانی نشستوں پر امیدواروں کے نام فائنل کرنے کے بارے میں پوچھے گئے سوال کے جواب میں بی جے پی جنرل سیکریٹری نے کہاکہ اس حوالے سے تبادلہ خیال ہو رہا ہے ۔انہوں نے کہاکہ جموں وکشمیر وہ خط ہے جہاں پر بی جے پی کے لیڈروں نے خون بہا یا ہے ۔
ان کے مطابق جموں وکشمیر میں ملک دشمن عناصر کو دبانے کی خاطر بھاجپا نے جو قربانیاں دی ہیں انہیں کھبی فراموش نہیں کیا جاسکتا۔
وزیر اعظم مودی کی سر نگر آمد کے بارے میں پوچھے گئے ایک اور سوال کے جواب میں بی جے پی لیڈر نے کہاکہ اس حوالے سے سرکاری طورپر جلد بیان سامنے آئے گا۔انہوں نے کہاکہ مودی جی کو اس وقت کشمیر سے لے کر کنیاکماری تک لوگوں کا آشیرواد حاصل ہے اور ملک کے لوگوں نے ٹھان لی ہے کہ مودی جی ہی تیسری مرتبہ وزیر اعظم بنیں گے ۔
بی جے پی کے قومی جنرل سیکریٹری کے مطابق ماضی میں جموں وکشمیر کے لیڈران محض چند ووٹ حاصل کرکے وزیر اعلیٰ اور ایم ایل اے بن جاتے تھے لیکن وہ زمانہ گزر گیا آج جموں وکشمیر کے لوگ پارلیمانی چناو میں بڑھ چڑھ کر اپنی رائے دہی کا استعمال کریں گے ۔