راج ناتھ سنگھ نے 2023 ایشیائی کھیلوں اور ایشیائی پیرا گیمز میں تمغات جیتنے والے سروس ایتھلیٹس کے لیے مالی ترغیب کو منظوری دی

نئی دہلی// وزیر دفاع راج ناتھ سنگھ نے ستمبر-اکتوبر 2023 میں چین کے ہانگزو میں منعقدہ 19ویں ایشیائی کھیلوں اور چوتھے ایشیائی پیرا گیمز میں تمغے جیتنے والے مسلح افواج کے اہلکاروں کے لیے مالی ترغیب کو منظوری دی ہے ۔ ایشیائی کھیلوں اور چوتھے ایشیائی پیرا گیمز دونوں کے لیے طلائی تمغہ جیتنے والوں کو فی کس 25 لاکھ روپے ، نقرئی تمغہ جیتنے والے کو فی کس 15 لاکھ روپے اور کانسے کا تمغہ جیتنے والوں کو فی کس دس دس لاکھ روپے کا نقد انعام دیا جائے گا۔
کئی سروس ایتھلیٹس نے کھیلوں میں قوم کا سر فخر سے بلند کیا تھا۔ وزیر دفاع نے ان کی واپسی پر انہیں مبارکباد دی اور ان کی شاندار کارکردگی کے لیے ان کی ستائش کی۔ انہوں نے 45 تمغہ جیتنے والوں کو نقد انعامات کی منظوری بھی دی تھی جن میں سات پیرا ایتھلیٹس بھی شامل تھے ۔ ان 45 ایتھلیٹس نے ایشیائی کھیلوں میں 09 طلائی، 18 نقرئی اور 17 کانسے کے تمغے جیتے اور ایشیائی پیرا گیمز میں ایک طلائی، 04 نقرئی اور 02 کانسے کے تمغے جیتے ۔
مسلح افواج کے اہلکاروں کے لیے وزارت دفاع کی طرف سے پہلی باراعلان کردہ ان مالی مراعات سے ان ایتھلیٹس کی پیرس اولمپکس گیمز 2024 کے کوالیفائنگ ایونٹس میں اور بھی بہتر کارکردگی کا مظاہرہ کرنے کے لیے مزید حوصلہ افزائی ہو گی جس کے لیے وہ سرِ دست تیاری میں مصروف ہیں۔