روس: گیس ایکسپورٹ ٹرمینل میں دھماکہ

ماسکو//
روس کے شہر سینٹ پیٹرزبرگ کے قریب گیس ایکسپورٹ ٹرمینل میں زبردست دھماکہ ہوگیا۔ دھماکے کی آواز دور دور تک سنی گئی۔غیر ملکی ذرائع ابلاغ کے مطابق گیس ایکسپورٹ ٹرمینل میں سینٹ پیٹرزبرگ کے قریب زور دار دھماکہ ہوا، جس کے باعث بڑے پیمانے پر آگ لگ گئی تاہم واقعہ میں کسی جانی نقصان کی کوئی اطلاع سامنے نہیں آئی۔مقامی میڈیا کا اس حوالے سے کہنا ہے کہ ٹرمینل میں آگ لگنے کی وجہ تاحال معلوم نہیں ہوسکی ہے لیکن مذکورہ علاقے میں ڈرون دیکھے گئے ہیں۔علاقائی گورنر الیگزینڈر ڈروزڈینکو کا اس حوالے سے کہنا ہے کہ خلیج فن لینڈ میں گیس پروڈیوسر نووٹیک کے ٹرمینل پر ہونے والے دھماکے کے بعد ہائی الرٹ سسٹم نافذ کر دیا گیا ہے۔
روسی وزارت دفاع کی جانب سے جاری کردہ بیان کے مطابق ہفتے کی رات یوکرین کے ساتھ سرحد کے قریب سمولینسک کے علاقے میں تین یوکرائنی ڈرونز کو تباہ کردیا گیا ہے۔