سنیل چھیتری کی قیادت میں ہندوستانی فٹ بال ٹیم قطر پہنچی

دوحہ// سنیل چھیتری کی قیادت میں ہندوستانی فٹ بال ٹیم اے ایف سی ایشین کپ 2023 میں شرکت کے لیے دوحہ پہنچ گئی ہے۔
ہفتہ کی شام یہاں پہنچنے والی ہندوستانی ٹیم کا پرجوش استقبال کیا گیا۔ ہندوستانی ٹیم 23 مہمان ٹیموں میں سے وہاں پہنچنے والی پہلی ٹیم ہے۔ ہندوستانی ٹیم اپنا پہلا میچ آسٹریلیا کے خلاف کھیلے گی۔
26 کھلاڑیوں کے دستے میں کچھ اہم کھلاڑی جیسے انور علی، جیکسن سنگھ تھوناوجم، عاشق کرونین اور روہت کمار زخمی ہونے کی وجہ سے شامل نہیں ہوسکے۔
نئے سال کے موقع پر میڈیا سے بات کرتے ہوئے، ہندوستانی ٹیم کے ہیڈ کوچ ایگور اسٹیمک نے کہا ’’ہم یہاں جلد آنا چاہتے تھے، مناسب طریقے سےڈھلنا چاہتے تھے اور بعد میں سفر کرنے میں وقت ضائع نہیں کرنا چاہتے تھے۔ ہم آج ایک ساتھ اپنا کام شروع کر رہے ہیں۔ ہم نے اپنا شیڈول طے کیا ہے جس میں دو دنوں میں چار سیشن ہوں گے، تیسرے دن آرام کریں گے ۔ 7 جنوری کو ہم ایک تربیتی میچ کھیلیں گے۔
انہوں نے کہا کہ ’’گزشتہ چند مہینوں میں چوٹوں کی وجہ سے ہمارے لیے چیزیں ڈرامائی طور پر تبدیل ہوئیں۔ ہم اس وقت اتنے اچھے نہیں ہیں جتنے ہم ہو سکتے تھے۔ ہم نے جسمانی صلاحیت اور پاسنگ کی صلاحیت کھو دی ہے۔ لیکن ہمارے پاس اس کے بارے میں سوچنے کا وقت نہیں ہے اور ہمیں ان لوگوں پر توجہ مرکوز کرنے کی ضرورت ہے جو یہاں ہمارے ساتھ ہیں۔”