’پاکستان نے مذاکرات کا جواب دہشت گردی سے دیا‘

جموں//
جموںکشمیر بھاجپا یونٹ کے صدر رویندر رینا نے بدھ کے روز کہاکہ پاکستان یوٹی میں حالات کو درہم برہم کرنے کی پالیسی پر گامزن ہے۔
رینا نے کہاکہ بھارت نے ہمیشہ امن و شانتی کی بات کی لیکن پاکستان نے اس کا جواب دہشت گردی کی صورت میں دیا۔
ان باتوں کا اظہاررینا نے سانبہ میں نامہ نگاروں سے بات چیت کے دوران کیا۔
بی جے پی یونٹ صدر نے کہاکہ بھارت نے ہمیشہ پاکستان کے ساتھ تعلقات کو بہتر بنانے کی خاطر بات چیت کا سہارا لیا لیکن پڑوسی ملک نے بھارت کی مثبت کوششوں کا دہشت گردی کی صورت میں جواب دیا۔
رینا نے مزید بتایا کہ پاکستان پر کسی بھی صورت میں بھروسہ نہیں کیا جاسکتا۔
فاروق عبداللہ کی جانب سے پاکستان کے ساتھ مذاکرات شروع کرنے کے بارے میں پوچھے گئے سوال کے جواب میں رویندر رینا نے کہا’’کیا فاروق عبداللہ اس بات کی گارنٹی لیتے ہیں کہ اگر بھارت پاکستان کے ساتھ بات چیت شروع کرتا ہے تو پاکستان کی اور سے دہشت گردی اور دراندازی بند ہو جائے گی‘‘۔
رینا نے کہاکہ موجودہ وزیر اعظم نریندر مودی نے بھی پڑوسی ملک کے ساتھ تعلقات کو استوار کرنے کی خاطر مذاکرات کی پیشکش کی لیکن اس کا جواب دہشت گردی کی صورت میں دیا گیا۔انہوں نے کہاکہ پاکستان میں عوامی سرکار کی کوئی نہیں سنتا ، وہاں پر جو بھی وزیر اعظم کی کرسی پر براجمان ہوا اس کو جیل کی ہوا کھانی پڑی۔انہوں نے کہاکہ پاکستان کو اسی کی زبان میں جواب دینے کا وقت آگیا ہے۔