ہاردک روہت کی جگہ ممبئی کے نئے کپتان ہوں گے

ممبئی// ) آل راؤنڈر ہاردک پانڈیا جنہوں نے گجرات ٹائٹنز کو چھوڑ کر انڈین پریمیئر لیگ (آئی پی ایل) کے آئندہ سیزن کے لیے ممبئی انڈینز (ایم آئی) میں واپسی کی ہے، کو ٹیم کا نیا کپتان مقرر کیا گیا ہے۔
ہاردک نے 2022 میں نئی ​​تشکیل شدہ گجرات ٹائٹنز میں بطور کپتان شمولیت اختیار کی۔ ان کی قیادت میں فرنچائز نے اپنے پہلے ہی سیزن میں کامیابی حاصل کی جبکہ آئی پی ایل کے آخری سیزن میں گجرات ٹائٹنز کو سنسنی خیز فائنل میں چنئی سپر کنگز کے ہاتھوں شکست کا سامنا کرنا پڑا۔
یہاں دلچسپ بات یہ ہے کہ ممبئی انڈینس نے روہت شرما کی قیادت میں پانچ بار آئی پی ایل ٹرافی اپنے نام کی ہے، لیکن اس بار ممبئی نے پانڈیا پر بطور کپتان بھروسہ کیا ہے۔ روہت شرما 2013 میں ممبئی کے کپتان بنے تھے۔ ان کی قیادت میں ممبئی 2013، 2015، 2017، 2019 اور 2020 میں چیمپئن بنی۔ آئی پی ایل کے آخری سیزن میں ممبئی ٹائٹل میچ میں جگہ بنانے سے محروم رہی تھی۔
ممبئی انڈینز کے گلوبل ہیڈ آف پرفارمنس مہیلا جے وردھنے نے کہاکہ "یہ مستقبل کی تیاری کی طرف ایک بڑا قدم ہے۔ ممبئی انڈینز کے پاس ہمیشہ ہی غیر معمولی قیادت رہی ہے، سچن سے لے کر ہربھجن سنگھ تک اور رکی پونٹنگ سے لے کر روہت شرما تک، جنہوں نے فوری کامیابی میں اپنا حصہ ڈالتے ہوئے، مستقبل کے لیے ٹیم کو مضبوط بنانے پر بھی نظر رکھی ہے۔ اس نظریے کے مطابق ہاردک پانڈیا آئی پی ایل 2024 کے سیزن کے لیے ممبئی انڈینز کی کپتانی سنبھالیں گے۔