سرینگر//
صوبائی کمشنر کشمیر ‘وِجے کمار بدھوری نے نٹی پورہ روڈ پر ٹریفک کی بھیڑ اور بار بار ٹریفک جام کو ختم کرنے کے لئے آج اَپنے سپاٹ وزٹ کے دوران آر اینڈ بی افسران پر زور دیا کہ وہ دسمبر کے آخر تک برزلہ بنڈ روڈ کو فعال بنائیں۔
اِس موقعہ پر صوبائی کمشنر کشمیر کے ہمراہ آر اینڈ بی، ٹریفک پولیس اور ریونیو کے سینئر افسران بھی تھے۔
یہ بات قابل ذکر ہے کہ مین سڑک پر ٹریفک کی روانی کو آسان بنانے کیلئے مصروف اوقات میں ٹریفک کا رخ موڑنے کیلئے نٹی پورہ سے برزولا پل تک ایک سڑک تعمیر کی جارہی ہے۔
صوبائی کمشنر کشمیر نے سڑک کی پوری لمبائی پیدل چلتے ہوئے سڑک پر مکمل ہونے والے اور جاری کاموں کا معائنہ کیا۔ اُنہوں نے سڑک سے تجاوزات ہٹانے اور زیر اِلتوا ٔکام کو جلد مکمل کرنے کی ہدایت دی۔
بدھوری کوجانکاری دی گئی سڑک کا آدھا حصہ مکمل ہو چکا ہے جبکہ باقی آدھا حصہ تعمیر کیا جا رہا ہے جو پندرہ دِن میں مکمل کیاجائے گا۔
اِس موقعہ پر مقامی لوگوں نے متوازی بنڈ روڈ کی ترقی سے نٹی پورہ میں بار بار ہونے والے ٹریفک جام کو ختم کرنے کے ان کے دیرینہ مطالبہ کو پورا کرنے پر صوبائی اَنتظامیہ کا شکریہ اَدا کیا۔
صوبائی کمشنر موصوف نے برزلہ نہرکے بائیں کنارے پر واک وے اور سائیکل ٹریک کی ترقی کے جاری کاموں کا بھی معائنہ کیا۔
اِس موقعہ پراُنہیں ایس ایس سی ایل کی جانب سے جاری ترقیاتی منصوبوں کی خوبصورتی اور ترقیاتی منصوبوں کے بارے میں جانکاری دی گئی۔