نئی دہلی// وزیر تعلیم دھرمیندر پردھان نے بدھ کو راجیہ سبھا میں کہا کہ حکومت انڈین انسٹی ٹیوٹ آف ٹیکنالوجی جیسے اداروں میں کھیل کوٹہ دینے پر غور کر رہی ہے ۔
ایوان میں وقفہ سوال کے دوران ایک ضمنی سوال کا جواب دیتے ہوئے مسٹر پردھان نے کہا کہ حکومت کا مقصد طلباء کے اوپر سے داخلہ امتحانات کا دباؤ کم کرنا ہے ۔ اس کے لیے مختلف اقدامات کیے جا رہے تھے ۔ فٹ انڈیا اور کھیلو انڈیا جیسی مہم بھی اسی سمت میں ایک قدم ہے ۔ وہ کوچنگ اداروں میں طلبہ کی خودکشی سے متعلق سوال کا جواب دے رہے تھے ۔
انہوں نے کہا کہ باوقار اداروں میں داخلے کے لیے بہت سے داخلہ امتحانات ہوتے ہیں۔ ہر سال تقریباً 70 لاکھ اسکولی بچے ان میں بیٹھتے ہیں۔ ممبران کے خدشات سے اتفاق کرتے ہوئے انہوں نے کہا کہ راجستھان کے کوٹا میں کوچنگ انسٹی ٹیوٹ کو چلانے کے لیے سخت ہدایات جاری کی گئی ہیں۔ دیگر ریاستی حکومتوں نے بھی کوچنگ اداروں کو کنٹرول کرنے کی کوشش کی ہے ۔
مسٹرپردھان نے کہا کہ امتحانات کے دباؤ کو کم کرنے کے لیے حکومت انجینئرنگ، میڈیکل اور دیگر اداروں میں کھیلوں کا کوٹہ مقرر کرنے پر غور کر رہی ہے ۔
انہوں نے کہا کہ داخلہ امتحانات کے دباؤ کا سامنا کرنے والے طلبہ کو مدد فراہم کرنے کے لیے کاؤنسلنگ پورٹل منودرپن شروع کیا گیا ہے ۔ انہوں نے کہا کہ طلباء کی خودکشی کے واقعات افسوسناک ہیں۔