شملہ حادثہ:والٹینگو نارڈ گاؤں میں لوگ سوگوار

سرینگر//
شملہ میں پیش آئے سڑک حادثے میں کولگام کے والٹینگو نارڈ سے تعلق رکھنے والے چھ مزدور جاں بحق ہوئے ہیں۔
ضلع ترقیاتی کمشنر کولگام سمیت سینئر آفیسران نے علاقے کا دورہ کیا اورجاں بحق افراد کے اہل خانہ سے ملاقات کی۔
اطلاعات کے مطابق شملہ میں سڑک کے ایک دلدوز حادثے میں کولگام کے دور افتادہ گاوں والٹینگو نارڈ سے تعلق رکھنے والے چھ مزدور جاں بحق ہوئے ہیں۔
معلوم ہوا ہے کہ منگل کے روز مختلف سیاسی ، سماجی اور مذہبی تنظیموں کے عہدیداروں نے علاقے کا دورہ کیا اورمارے گئے افرزد کے اہل خانہ سے تعزیت پرسی کی۔
مقامی لوگوں نے بتایا کہ چھ مقامی نوجوان مزدوری کی خاطر شملہ گئے ہوئے تھے لیکن حادثے میں ان کی موت واقع ہوئی۔انہوں نے بتایا کہ جاں بحق افراد گھر کے واحد کفیل تھے اور ان کے کنبے کسمپرسی کی حالت میں زندگی گزاررہے ہیں۔
لوگوں نے جموں وکشمیر انتظامیہ سے مطالبہ کیا ہے کہ ہلاک شدگان کے گھر والوں کو بھر پور معاوضہ فراہم کیا جائے ۔
ایل جی منوج سنہا کی ہدایت پر ضلعی ترقیاتی کمشنر کولگام ، تحصیلدار اور دوسرے سینئر آفیسران نے علاقے کا دورہ کیا اور لواحقین کویقین دلایا کہ ان کی ہر طرح سے مدد فراہم کی جائے گی۔
دریں اثنا نیشنل کانفرنس کے صدر ڈاکٹر فاروق عبداللہ اور نائب صدر عمر عبداللہ نے حادثے پر گہرے صدمے کا اظہار کیاہے ۔
لیڈران نے اس سانحہ پر مرحومین کے جملہ سوگواران کیساتھ تعزیت کا اظہار کیا اور اُن کی جنت نشینی اور بلند درجات کیلئے دعا کی۔ انہوں نے حکومت سے مطالبہ کیا کہ ہلاک شدگان کے اہل خانہ کو معقول اور مناسب ایکس گریشیا ریلیف فراہم کی جائے ۔