پلوامہ جھڑپ میںلشکر کا مقامی جنگجو جاں بحق

سرینگر//
جنوبی کشمیر کے ضلع پلوامہ کے آری ہال علاقے میں جمعرات کی رات سیکورٹی فورسز اور جنگجوؤں کے درمیان شروع ہونے والاتصام لشکر طیبہ سے وابستہ ایک مقامی جنگجو کے جاں بحق ہونے پر اختتام پذیر ہوا۔جاں بحق جنگجو کی شناخت کفایت ایوب الائی ولد محمد ایوب الائی ساکن پنجورہ شوپیاں کے بطور کی گئی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ دہشت گردوں کی موجودگی کے متعلق مصدقہ اطلاع موصول ہونے پر پلوامہ پولیس، فوج کی۴۴آر آر اور سی آر پی ایف کی۱۸۲ویںبٹالین کی مشترکہ ٹیم نے پلوامہ کے آری ہال علاقے کو محاصرے میں لے کر تلاشی آپریشن شروع کر دیا۔
ترجمان نے کہا کہ تلاشی آپریشن کے دوران سیکورٹی فورسز کی ایک ٹیم جب مشتبہ مقام کے نزدیک پہنچی تو ویاں چھپے دہشت گرد نے اس پر اندھا دھند فائرنگ کی جس کے نتیجے میں طرفین کے درمیان تصادم چھڑ گیا۔
پولیس کا کہنا تھا’’تصادم آرائی کے دوران کفایت ایوب الائی ولد محمد ایوب الائی ساکن پنجورہ شوپیاں نامی دہشت گرد کو مارا گیا جو کالعدم جنگجو تنظیم لشکر طیبہ سے وابستہ تھا اور جائے انکائونٹر سے اس کی لاش بھی بر آمد کی گئی‘‘۔
پولیس بیان میں کہا گیا’’پولیس ریکارڈ کے مطابق جاں بحق دہشت گردی سے متعلق کئی جرائم میں ملوث تھا اور اس کے خلاف پولیس اسٹیشن شوپیاں میں کئی مقدمے درج ہیں‘‘۔
بیان کے مطابق جائے تصادم سے اسلحہ و گولہ بارود بر آمد بر آمد کیا گیا جس میں ایک پستول‘۲میگزین‘۵آر ڈی ایس اور۲گرینیڈ شامل ہیں۔انہوں نے کہا کہ اس سلسلے میں متعلقہ دفعات کے تحت ایک کیس درج کرکے مزید تحقیقات شروع کی گئی ہے۔