سرینگر///
جموں کشمیر کے ڈائریکٹر جنرل آف پولیس( ڈی جی پی) آر آر سوائن نے ہفتہ کو کہا کہ دہشت گرد تنظیموں کیلئے لوگوں کی بھرتی کو دہشت گردی کی کارروائی کے طور پر سمجھا جائے گا۔
سوائن نے کہا کہ قانون نافذ کرنے والے ادارے دہشت گرد گروپوں کیلئے بھرتیوں کے ساتھ ساتھ منشیات فروشوں اور سمگلروں کے خلاف کریک ڈاؤن کر رہے ہیں۔
’’بھرتی کے ہر عمل کو دہشت گردی کے طور پر دیکھا جائے گا۔ جو لوگ کسی نوجوان کو دہشت گرد صفوں میں شامل ہونے کے لیے اکسانے یا سہولت فراہم کرتے ہیں وہ برابر کے ذمہ دار ہوں گے، اگر زیادہ نہیں۔ حوصلہ افزائی اور بھرتی کرنے والے لوگوں کے خلاف مسلسل کارروائی کی جائے گی‘‘۔
سوائن نے یہاں پولیس ہیڈکوارٹر میں ڈی جی پی کی عوامی شکایات کے ازالے کے اجلاس کے بعد نامہ نگاروں کو بتایا۔
ڈی جی پی نے کہا کہ نوجوانوں کو اکسانے کیلئے’’آزادی اظہار کے پیچھے چھپنے والے مصنفین کے خلاف بھی کارروائی کی جائے گی‘‘۔
سوائن نے مزید کہا کہ سکیورٹی اداروں کا مقصد یہ ہے کہ دہشت گردوں کی صفوں میں ہر گز بھرتی نہ ہو۔ ڈی جی پی نے کہا کہ اگر کوئی دہشت گرد صفوں میں شامل ہوا ہے تو پولیس اس کے بارے میں ان کے والدین، دوستوں اور اساتذہ اور مسجد کمیٹیوں کے ذریعے جاننے کی کوشش کرتی ہے۔
ڈی جی پی کاکہنا تھا’’یہ اکیلے پولیس کا کام نہیں ہے۔ اگر اجتماعی کوشش ہو تو جانیں بچائی جا سکتی ہیں۔ ہماری کوشش ہوگی کہ دوسری طرف بیٹھے ہینڈلرز کو کاٹ دیا جائے… وہ پیسے کا استعمال کرتے ہیں اور نوجوانوں کو دہشت گردوں کی صفوں میں شامل ہونے کیلئے اکساتے ہیں۔ اس کے خلاف ایک منصوبہ بند اور مستقل جنگ کی ضرورت ہے، اور ہم یہ کریں گے‘‘۔
کنٹرول لائن کے اس پار سے منشیات کی اسمگلنگ پر تشویش کا اظہار کرتے ہوئے، ڈی جی پی نے کہا ’’تھوک ڈیلرز کو نشانہ بنانے کیلئے قانون نافذ کرنے والے اداروں کی طاقت کو یکجا کیا جائے گا۔ہم بڑی مچھلیوں کے پیچھے پڑیں گے‘‘۔
پولیس سربراہ نے کہ ا’’ہم ان ہول سیل ڈیلرز کے خلاف تمام ایجنسیوں جیسے ای ڈی‘آئی ٹی’این آئی اے ‘ایس آئی اے اور ضلعی پولیس کی طاقت کو ضم کریں گے۔ ہم ایسی صورتحال پیدا نہیں کرنا چاہتے جہاں ان لوگوں کی خوشحالی دوسروں کو راغب کرے۔ ہم اس ماڈل کو ختم کرنا چاہتے ہیں۔ وہ اپنا گھر اور اپنی زمینیں کھو دیں گے۔ ہم اس کے لیے پرعزم ہیں‘‘۔
ڈی جی پی نے کہا کہ جو بھی منشیات کے کاروبار میں سہولت کار پایا گیا اس کے ساتھ سختی سے نمٹا جائے گا۔ انہوںنے کہا’’پہلے یہ چرس تھا، جو مقامی طور پر دستیاب تھا۔ یہ اتنا نقصان دہ نہیں تھا جتنا کہ ہیروئن اور براؤن شوگر جو سرحد پار سے آرہا ہے۔ یہ ایک زہر ہے جسے بیچا جاتا ہے اور اس سے حاصل ہونے والی رقم لوگوں کو مارنے میں استعمال ہوتی ہے۔ اگر کوئی بھی اس میں ملوث پایا جاتا ہے، چاہے وہ پولیس اسٹیبلشمنٹ سے ہو یا معاشرے کے کسی بھی طبقے سے، ہم سختی سے کارروائی کریں گے‘‘۔
عوام سے ملاقات پر ڈی جی پی نے کہا کہ یہ لوگوں کی شکایات کو دور کرنے کی طرف ایک نئی کوشش ہے۔
سوائن نے کہا’’مجھے یقین نہیں تھا کہ کتنے لوگ آئیں گے اور وہ کیا مسائل لے کر آئیں گے۔ یہ میرے لیے بھی ایک تجربہ ہے۔ اس کی ایک میسج ویلیو ہے، یہ لوگوں سے تعلق ہے۔ اس کے ٹھوس نتائج برآمد ہوں گے کیونکہ مجھے معلوم ہوگا کہ پولیس انتظامیہ پر کس قسم کی چیزیں اثر انداز ہوتی ہیں‘‘۔
پولیس سربراہ نے کہا’’کچھ مسائل ایسے ہیں جنہیں فوری طور پر حل کیا جا سکتا ہے جبکہ کچھ کو مزید جانچ کی ضرورت ہے۔ ہم اسے فالو اپ سسٹم کے ساتھ بہتر کرنے کی کوشش کریں گے جہاں شکایت کنندہ اپنی شکایات کا پتہ لگاسکے۔ ہم شکایت کنندگان کو بتائیں گے کہ ہم ان کے مسائل کے بارے میں کیا کر سکتے ہیں یا نہیں کر سکتے ہیں۔‘‘
سوائن نے مزید کہاکہ ہوسکتا ہے کہ ان کے پاس تمام مسائل کا حل نہ ہو لیکن پولیس انتظامیہ سے متعلق مسائل کو حل کیا جائے گا۔
