ترنمول کانگریس نے مہوا موئترا کو ندیا ضلع کے کرشنا نگر ضلع کا تنظیمی صدر مقررکیا

کلکتہ// روپے اور تحفے کے عوض سوال پوچھنے کے معاملے میں پارلیمنٹ کی اخلاقیاتی کمیٹی کے ذریعہ کارروائی کا سامنا کررہی ترنمول کانگریس کی ممبر پارلیمنٹ مہو اموئترا سے متعلق پارٹی قیادت کی طویل خاموشی کے بعد ترنمول کانگریس نے ندیا ضلع کے کرشنا نگر ضلع کا تنظیمی صدر مقرر کیا ہے ۔جب کہ چھپرا سے رکن اسمبلی رکبان الرحمن کو چیرپرسن بنایا گیا ہے ۔سیاسی تجزیہ نگاروں کا ماننا ہے کہ پارٹی نے اس فیصلے کے ذریعہ مہوا کے ساتھ کھڑے ہونے کا پیغام دیا ہے ۔
ممبر پارلیمنٹ مہوا موئترا نے پارٹی قیادت کا شکریہ ادا کیا ہے ۔اس سے قبل پارٹی نے کہا تھا کہ مہوا موئترا اپنی لڑائی خود لڑنے کی صلاحیت رکھتی ہیں ۔اپوزیشن جماعتوں کی طرف سے سوالا ت اٹھائے جارہے تھے کہ پارٹی مہوا کے حق میں بیان کیوں نہیں دے رہی ہے ۔کیا ممتابنرجی اور ترنمول کانگریس قبول کرتی ہے کہ مہوا موئترا قصور وار ہیں۔اب پارٹی مہوا کے حق میں بیان جاری کرنے کے بجائے مہوا کو تنظیمی ذمہ داری دی ہے ۔ کہا جارہا ہے کہ پارٹی نے بے لفظوں میں واضح پیغام دینے کی کوشش کی ہے ۔یہ بھی مانا جارہا ہے کہ گر مہوا کو اگلے لوک سبھا انتخابات میں سزا کے طور پر کھڑا نہیں ہونے دیا جاتا ہے ، تو پارٹی انہیں تنظیمی طور پر استعمال کرے گی۔ یہ فیصلہ اس کا پیغام بھی ہو سکتا ہے ۔
ترنمول کانگریس نے 2021 کے اسمبلی انتخابات کے بعد اپنا تنظیمی ڈھانچہ تبدیل کر دیا ہے ۔ اس وقت سے ، حکمران جماعت نے ایک انتظامی ضلع کو متعدد تنظیمی اضلاع میں تقسیم کیا۔ مہوا اس سے پہلے ندیا ضلع کی صدر تھیں۔ لیکن جب ترنمول کانگریس نے ندیا کو کرشن نگر اور رانا گھاٹ کے درمیان تقسیم کیا تو مہوا کو تنظیمی ذمہ داری نہیں دی گئی۔ وہ صرف ایم پی کے طور پر تھیں ۔
ترنمول کانگریس کے کرشن نگر تنظیمی ضلعی صدر ایم ایل اے کلول خان تھے ۔ وہ کافی عرصے سے بیمار ہیں۔ وہ ایک عرصے سے پارٹی کے کاموں میں بھی غیر فعال تھے ۔ بتایا جاتا ہے کہ کلول نے اپنے قریبی حلقے میں ضلع صدر کے عہدے سے استعفیٰ دینے کی خواہش بھی ظاہر کی۔ اس نقطہ نظر سے کرشنا نگر میں صدر کی تبدیلی ناگزیر تھی۔
پارلیمنٹ کی اخلاقیات کمیٹی نے مہوا کے خلاف رشوت کے بدلے سوالات سے متعلق شکایت کی جانچ کی ہے ۔ کمیٹی نے لوک سبھا اسپیکر اوم برلا کو مہوا کو رکن پارلیمنٹ کے طور پر نااہل قرار دینے کی سفارش بھیجی ہے ۔ پارلیمنٹ کے سرمائی اجلاس کے پہلے دن لوک سبھا میں اس پر بحث ہوگی۔ ایم پی مہوا کے مستقبل کا فیصلہ اس کے بعد کیا جائے گا۔ تاہم بہت سے لوگوں کا خیال ہے کہ مہوا کو موجودہ لوک سبھا سے نکال دیا جائے گا۔ اسی وجہ سے مانا جارہا ہے کہ پارٹی نے پیغام دینے کی کوشش کی ہے کہ پارٹی مہوا کے ساتھ ہے ۔
پارٹی کے آل انڈیا جنرل سکریٹری ابھیشیک بنرجی نے کئی سالوں تک ایسی تبدیلیوں میں اہم کردار ادا کیا۔ اس ردوبدل میں مہوا کے چارج سنبھالنے کے بعد، یہ زیادہ واضح ہے کہ ممتا-ابھیشیک مہوا کی طرف ہیں۔ مہوا کے سیاسی مستقبل کے لیے مثبت سمجھا جا رہا ہے ۔ مہوا نے ہمیشہ کہا ہے کہ ممتا اور ابھیشیک ان کے ساتھ ہیں۔ حال ہی میں مہوا کے سوال پر ابھیشیک بنرجی نے کہا کہ آخر مہوا کے خلاف کارروائی میں اتنی تیزی کیوں لائی گئی ہے ۔ ابھیشیک نے کہاکہ وہ اپنی جنگ خود لڑ سکتی ہے ۔