اگلے۱۰دنوں میں موسم خراب ہونے کا کوئی امکان نہیں

سرینگر//
محکمہ موسمیات کے مطابق وادی کشمیر میں اگلے ۱۰دنوں کے دوران وسیع پیمانے پر برف وباراں کا کوئی امکان نہیں ہے ۔
محکمہ موسمیات سرینگر کے ڈپٹی ڈائریکٹر مختار احمد نے میڈیا کو بتایا کہ وادی کشمیر میں اگلے دس دنوں کے دوران وسیع پیمانے پر برف باری یا بارشوں کا کوئی امکان نہیں ہے ۔
احمد نے کہا’’جیسا کہ پہلے ہی پیش گوئی کی گئی ہے کہ ۲نومبر تک موسم مجموعی طور پر خشک رہنے کا امکان ہے تاہم۲۹؍اکتوبر کو موسم ابر آلود رہ سکتا ہے جس کے نتیجے میں پہاڑی علاقوں میں کہیں کہیں ہلکی برف باری متوقع ہے ‘‘۔
ڈپٹی ڈائریکٹر نے کہا کہ بعد ازاں۲؍اور۳ نومبر کو بھی موسم ابر آلود رہنے کا امکان ہے اور پہاڑی علاقوں میں ہلکی برف باری یا بارشوں کا امکان ہے ۔انہوں نے کہا کہ جموں وکشمیر میں اگلے دس دنوں کے دوران وسیع پیمانے پر بارشوں یا یرف باری کا کوئی امکان نہیں ہے ۔
احمد کا کہنا تھا کہ وادی میں آنے والے دنوں میں صبح اور شام کے وقت روشنی میں قدرے کمی متوقع ہے ۔
دریں اثنا ساز گار موسم کے بیچ وادی کشمیر کو ملک کے باقی حصوں کے ساتھ جوڑنے والی سرینگر‘ جموں قومی شاہراہ پر ٹریفک کی نقل و حمل حسب معمول جاری ہے ۔
جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والے تاریخی مغل روڈ اور سرینگر ‘ لیہہ شاہراہ پر ٹریفک رواں دواں ہے ۔