وزیر اعلیٰ ممتا بنرجی کے پائوں میں انفیکشن برقرار ۔۔27اکتوبر تک گھر پر ہی آرام کریں گی

کلکتہ// وزیرا علیٰ ممتا بنرجی نے اپنی رہائش گاہ پر کابینہ کی میٹنگ کے بعد کہا کہ ان کے پائوں میں اب بھی انفیکشن ہے اور ڈاکٹروں نے آرام کا مشورہ دیا ہے اس لئے وہ اپنی تمام خواہشو ں اور پارٹی لیڈروں کی درخواست کے باوجود درگا پوجا کے موقع پر نہ باہر نکل سکیں گی اور نہ ہی پارٹی ترجمان‘‘ جاگو بنگلہ’’ کے پوجا نمبر کے پروگرام میں شرکت کریں گی ۔
جمعرات کو کالی گھاٹ رہائش گاہ سے ورچوئل پوجا کا افتتاح کرتے ہوئے وزیر اعلیٰ نے کہا کہ وہ 27 اکتوبر کو اپنے گھر سے نکلیں گی۔ اس دن ریڈ روڈ پر پوجاکارنیوال کا حکومت نے انتظام کررکھا ہے ۔
جمعرات کو ریاستی کابینہ کی میٹنگ کے بعد وزیر اعلیٰ نے ورچوئل کلکتہ اور اضلاع میں سینکڑوں پوجاپنڈالوںکا افتتاح کیا۔ اس موقع پر ممتا بنرجی نے کہا کہ میں ٹھیک نہیں ہوں، پائوں میں انفیکشن ہے ۔ابھی بھی آئی وی انجیکشن لگ رہے ہیں ۔ میں ٹھیک سے چل نہیں سکتی ہوں۔ ڈاکٹروں نے کہا کہ مزید کچھ دن پیدل نہیں چلنے کا مشورہ دیا ہے ۔ممتا بنرجی نے واضح کیا ہے کہ اس مرتبہ وہ ذاتی طور پر کسی پوجا کا افتتاح نہیں کر سکیں گی۔وزیر اعلیٰ نے پوجا کے منتظمین سے یہ بھی کہاکہ ‘‘اس بار میں پوجا کے افتتاح میں نہیں جا سکوں گی۔ 27 تاریخ کو کارنیول میں ملتے ہیں۔ آپ سب آئیں گے ۔ میں اس دن باہر آؤں گی۔ایک مہینے سے زائد عرصے سے وزیر اعلیٰ ممتا بنرجی نے ریاستی سیکریٹریٹ نوبنو کا دورہ نہیں کیا ہے ۔پوجا سے قبل وہ اپنے دفتر لوٹنا چاہتی تھی مگر ڈاکٹروں نے انہیں مکمل طور پر چلنے سے منع کردیا ہے ۔
وزیراعلیٰ نے 12 ستمبر کو اسپین اور دبئی کا دورہ کیا۔ 23 ستمبر کو واپس آئیں۔ اسپین میں ہی پرانے چوٹ کے ساتھ ایک اور جگہ چوٹ لگ گئی تھی۔کلکتہ واپس آنے کے بعد وہ ایس ایس کے ایم اسپتال میں ڈاکٹروں سے ملاقات کی تھی۔ اسپین میں چوٹ لگنے کے باوجود ممتا بنرجی نے دورہ جاری رکھا تھا ۔ وزیر اعلیٰ نے جمعرات کو شمالی بنگال کے ساتھ ساتھ جنوبی بنگال کے مختلف اضلاع میں پوجا کا افتتاح کیا۔ وزیر اعلیٰ نے کہا کہ کالمپونگ میں سیلاب سے متاثرہ خاندانوں کو ریاستی حکومت تین لاکھ روپے کا معاوضہ دے گی۔
یونیسکو کی جانب سے بنگال کی درگا پوجا کو جدید روایت کا خطاب دینے کے بعد یہ پہلی پوجا ہے ۔ پوجا کمیٹیوں کے ذمہ داروں سے خطاب کرتے ہوئے وزیر اعلیٰ نے کہاکہ ‘‘اس مرتبہ بڑی تعداد میں غیر ملکی مہمان آئیں گے ۔ ہم نہیں جانتے کہ وہ کہاں اور کب آئیں گے ۔ لیکن آپ تیار رہیں ۔ وہ جاتے ہی شنکھ پھونک کر اور الودھوانی بنا کر ان کا استقبال کریں گے ۔ ان کی مہمان نوازی کریں ۔