’ایل جی ملاقات‘ میں عوامی شکایات کا ازالہ

سرینگر//
لیفٹیننٹ گورنر‘ منوج سنہا نے آج ورچوئل موڈ کے ذریعے عوامی شکایات سننے کے دوران شہریوں سے بات چیت کی ۔ شہریوں کا انتخاب جموں و کشمیر کے مربوط شکایات کے ازالے اور نگرانی کے نظام پر جمع کرائی گئی شکایات کی بنیاد پر کیا جاتا ہے ۔
بات چیت کے دوران لیفٹیننٹ گورنرنے درخواست گزاروں کی کئی شکایات کا موقع پر ہی ازالہ کیا ۔
عوامی شکایات کا ازالہ کرتے ہوئے سنہا نے محکموں اور ضلعی انتظامیہ کو ہدایت دی کہ وہ سیلاس میں کام کرنے کے رحجان کو ختم کریں اور شہریوں کی شکایات کو کوارڈینیشن کے ذریعے حل کرنے کیلئے ایک فعال طریقہ اختیار کریں ۔
سنہا نے کہا ’’ہر شہری کیلئے قابلِ رسائی اور معیاری عوامی خدمات ہماری ترجیح ہے ۔ جے کے آئی جی آر اے ایم ایس پر مجموعی طور پر تصرف کی شرح ۹۷ فیصد تک پہنچ گئی ہے جو کہ لوگوں کے ادارہ جاتی اعتماد میں اضافہ کی نشاندہی کرتی ہے ‘‘۔
لیفٹیننٹ گورنرنے افسران سے کہا کہ ہمیں صرف موجودہ کامیابیوں کی عکاسی نہیں کرنی چاہئے بلکہ مستقبل کی تشکیل کیلئے ایک مضبوط نظام بنانے کی کوشش کرنی چاہئے ۔
گاندر بل سے تعلق رکھنے والے سجاد احمد شیخ کی جانب سے پیٹھ پورہ خانان کے سرکاری پرائمری سکول کی عمارت کو پہنچنے والے نقصان کی شکایت کا جواب دیتے ہوئے لیفٹیننٹ گورنر نے پرنسپل سیکرٹری سکول ایجوکیشن اور ڈائریکٹر سکول ایجوکیشن کو ہدایت دی کہ وہ اس بات کو یقینی بنائیں کہ کوئی بھی اسکول کسی بھی خستہ حال ڈھانچے میں کام نہیں کرے گا ۔
ریاسی کے علاقے دگہ ارناس میں ایک ڈسپنسری میں صحت کے مناسب عملے کی عدم دستیابی کے معاملے پر توجہ دیتے ہوئے سنہا نے ڈائریکٹر ہیلتھ سروسز کو ہدایت دی کہ وہ علاقے میں صحت کے عملے کو معقول بنانے کیلئے ایک جامع مشق کریں اور ایک ہفتے کے اندر رپورٹ پیش کریں ۔
اننت ناگ سے تعلق رکھنے والے بلال احمد ڈار نے لوگری پورہ پہلگام میں غیر فعال فلٹریشن پلانٹ کے مسئلہ پرلیفٹیننٹ گورنر کی توجہ مبذول کرائی ۔انہوں نے ڈپٹی کمشنر کو اس سلسلے میں رپورٹ پیش کرنے کی ہدایت دی ۔ انہوں نے مزید کہا کہ اس بات کو یقینی بنایا جانا چاہئے کہ حکومتی اثاثے ناکارہ نہ ہوں اور اسے لوگوں کی فلاح و بہبود کیلئے استعمال کیا جائے ۔
پرانے قصبے کشتواڑ میں بارش کے دوران سیوریج کے پانی کے اوور فلو سے متعلق شکایت پر اے ڈی ڈی سی نے چیئر کو بریفنگ دی کہ یہ معاملہ پہلے ہی میونسپل کونسل اور دیگر متعلقہ ایجنسیوں کے ساتھ اٹھایا جا چکا ہے جس پر لیفٹیننٹ گورنر نے حکام کو ہدایت دی کہ اس طرح کے مسائل کو حل کرنے کیلئے وہ قبل از وقت رویہ اختیار کریں ۔
سنہا نے ضلعی انتظامیہ اور محکموں کی طرف سے گذشتہ ملاقات کے دوران دی گئی ہدایات پر کی گئی کارروائی کے بارے میں آگاہی حاصل کی ۔
لیفٹیننٹ گورنرنے بڑھاپے اور بیوہ پینشن اور دیگر سماجی بہبود کی اسکیموں کی منظوری میں التوا کی ضلع وار حیثیت کا بھی جائزہ لیا ۔
بعد میں لیفٹیننٹ گورنر نے گاندھی جینتی کیلئے محکموں اور ضلعی انتظامیہ کی طرف سے کئے گئے انتظامات اور یکم اور۲؍اکتوبر کو ہونے والے بڑے پروگراموں سے پہلے کی تیاریوں کا جائزہ لیا ۔
سیکرٹری عوامی شکایات ‘ریحانہ بتول نے ایل جی ملاقات کی کارروائی چلائی ۔
اب تک جے کے آئی جی آر اے ایم ایس پر۳لاکھ۳ہزار۸ درخواستیں موصول ہوئی تھیں اور ان میں سے ۳لاکھ۴۳ہزار۴۸۴ کو۹۷فیصد کے مجموعی تصرف کی شرح کے ساتھ حل کیا گیا ہے ۔