مقبوضہ کشمیر میں مقیم پونچھ کے دہشت گرد کا قتل

سرینگر///
پاکستان کے زیر قبضہ کشمیر کے راولاکوٹ علاقے میں نامعلوم مسلح افراد نے جموں کے پونچھ ضلع سے تعلق رکھنے والے ایک علیحدگی پسند کارکن ریاض ابو قاسم کو گولی مار کر ہلاک کردیا۔
اطلاعات کے مطابق قاسم مسجد القدس میں نماز فجر ادا کررہے تھے، جب ان پر گولیاں چلائی گئیں۔
ریاض قاسم ولد محمد اعظم کوٹلی کے اس کیمپ میں رہائش پذیر تھے،جو ان کشمیریوں کیلئے قائم کیا گیا تھا جو نوے کی دہائی میں جموں و کشمیر کے مختلف علاقوں سے نقل مکانی کرکے پاکستانی حدود میں داخل ہوگئے تھے۔
ان میں عسکریت پسند بھی شامل ہیں اور وہ لوگ بھی جو کنٹرول لائن پر گولہ باری کے مسلسل واقعات کے بعد ہجرت کرنے پر مجبور ہوگئے تھے۔معلوم ہوا ہے کہ ریاض قاسم نے جموں و کشمیر یونائٹیڈ موومنٹ کے نام سے ایک سیاسی جماعت قائم کی تھی جسے پاکستان کے زیر قبضہ کشمیر کے الیکشن کمیشن میں رجسٹریشن بھی کی گئی تھی۔
اس سے قبل نامعلوم بندوق برداروں نے پاکستان کے شہر راولپنڈی میں بشیر احمد پیر نامی سابق عسکریت پسند کو ہلاک کردیا تھا جس کا تعلق حزب المجاہدین کے ساتھ تھا۔ پیر کی ہلاکت سے پہلے دولت اسلامیہ سے تعلق رکھنے والے بین الاقوامی عسکریت پسند اعجاز احمد آہنگر کو افغانستان میں پْراسرار طور پر ہلاک کیا گیا۔
بشیر احمد پیر کو حکومت ہند کے محکمہ داخلہ نے غیر قانونی سرگرمیوں کے انسداد سے متعلق ایک یو اے پی اے کے تحت ’دہشت گرد‘قرار دیا تھا۔ پیر ۱۹۹۰ کے اوائل میں اپنے کنبے کے ساتھ پاکستان منتقل ہوگئے تھے،جب مبینہ طور سرکار کے اعانت یافتہ بندوق برداروں نے ان کے والد سکندر پیر اور بھائی نزیر احمر پیر کو ہلاک کردیا تھا۔
آہنگر المعروف ابو عثمان الکشمیری کا تعلق سرینگر سے تھا اور وہ کئی سال سے پاکستان اور افغانستان میں مقیم تھا۔ وہ پہلے پاکستانی زیر قبضہ کشمیر سے تعلق رکھنے والے القاعدہ لیڈر الیاس کشمیری کا معاون تھا لیکن بعد میں اس نے اپنی وفاداریاں دولت اسلامیہ کے ساتھ منسلک کی تھیں۔
اس سے قبل بھی پاکستان کے زیر قبضہ کشمیر اور راولپنڈی میں متعدد کشمیریوں کو ہلاک کیا گیا ہے۔ پاکستانی حکام نے ان ہلاکتوں کے بارے میں ابھی تک کوئی تفصیلی بیان نہیں دیا ہے۔